Ispaniya Kubogi yarim final javob o‘yinida “Barselona” va “Real Madrid” jamoalari to‘qnash keladi. Madridda o‘tgan dastlabki o‘yinda “Barselona” 0:1 hisobidagi g‘alabani qo‘lga kiritgandi. Quyida “El-Klasiko” tarixidagi eng yaxshi to‘purarlar yodga olinadi.
Ferens Pushkash (“Real Madrid”) — 14 ta gol
“Real”ning vengriyalik afsonasi klasikolar tarixida 14 ta gol urgan. Ularning 9 tasi La Liga doirasida kiritilgan bo‘lsa, 3 ta to‘p Yevrokuboklarda kiritilgan. Pushkash 2 ta golini Ispaniya Kubogida urgan.
“Real”ga 31 yoshida kelgan va ajoyib davrni (1958—1967) o‘tkazgan “Pushechka-Bum” nafaqat klasikolar, balki “Real” tarixida ham eng yaxshi to‘purarlardan biri. Pushkash 242 ta gol bilan Madrid to‘purarlari ro‘yxatida 6-o‘rinda turadi.
Qayd etish kerak, Pushkash klasikolarda o‘rtacha gol urish bo‘yicha yetakchi hisoblanadi — 0,78 (18 o‘yinda 14 ta gol).
Sesar Rodriges (“Barselona”) — 14 ta gol
Faoliyatining qariyb 20 yilini (asosiy jamoada: 1939—1955) “ko‘k-anorranglilar” safida o‘tkazgan Sesar jamoa safida 351 ta o‘yin o‘tkazgan va ularda 232 ta gol urgan. Rodriges “Real”ga qarshi asosiy gollarini La Ligada kiritgan — 12 ta. Ispaniya Kubogida esa ikki bor azaliy raqib darvozasiga yo‘l topgan.
Sesar rasmiy o‘yinlardagi gollar bo‘yicha uzoq yillar davomida “Barselona”ning eng yaxshi to‘purari bo‘lib turdi. Biroq 2012-yilning mart oyida Lionel Messi uning rekordini yangiladi.
Faoliyatini yakunlagandan keyin bir mavsum katalonga bosh murabbiy bo‘lgan, biroq bu borada omadi chopmagan.
Fransisko Xento (“Real Madrid”) — 14 ta gol
Umrini “Real”ga bag‘ishlagan yana bir futbolchi. Pako 1953—1971-yillar davomida “qaymoqranglilar” sharafini himoya qilgan. Xento bir jamoa safida Yevropa Chempionlar Kubogini 6 marta qo‘lga kiritgan tarixdagi yagona futbolchi hisoblanadi.
“El-Klasiko”larda Xento La Liga doirasida 10 ta, Ispaniya Kubogi va Yevrokuboklarda 2 tadan to‘p kiritgan.
“Real” afsonasi 2022-yilning 18-yanvar kuni 88 yoshida vafot etdi.
Raul (“Real Madrid”) — 15 ta gol
Ismi “Real” nomi bilan yonma-yon aytiladigan afsonalardan biri. 1994—2010-yillar davomidagi faoliyati mobaynida Raul “Madrid”ning haqiqiy ramziga aylandi. 550 dan oshiq o‘yin o‘tkazdi va 220 dan ortiq gol urdi.
“Barselona”ga qarshi o‘yinlarda Raul 15 marta raqib darvozasiga yo‘l topgan. Ulardan 11 tasi Primerada, 3 tasi Superkubok o‘yinida va bitta Chempionlar Ligasida.
Raul o‘z vaqtida Di Stefanoning rekordini yangilab, “Real” tarixidagi eng yaxshi to‘purarga aylangandi. Keyinchalik undan Krishtianu Ronaldu va Karim Benzema o‘zib ketdi.
Alfredo Di Stefano (“Real Madrid”) — 18 ta gol
“Real”ning afsonaviy futbolchilaridan biri uzoq yillar davomida klasikolar tarixidagi eng yaxshi to‘purar maqomini saqlab turdi, “o‘zga sayyoraliklar” tashrifiga qadar. Klasikolarda 14 ta golni La Ligada, 2 tasini Ispaniya Kubogi va yana ikkitasini Yevrokuboklar doirasida urgan.
Janubiy Amerikadagi faoliyatidan keyin Yevropadagi sarguzashtlarini “Barselona”da boshlashi kutilgan Di Stefano oxir-oqibat “Real” safiga borib qo‘shilgandi. Madriddagi 12 yil davomida “sarg‘ish sochli mergan” ko‘p jabhadagi raqamlarni yangilab yubordi.
Krishtianu Ronaldu (“Real Madrid”) — 18 ta gol
“Real”ning eng yaxshi to‘purari klasikolarda ham gol urishdan to‘xtamagan. Uning 2011-yil “Barselona”ga kiritgan to‘pi Marca tomonidan yilning eng chiroyli goli sifatida e’tirof etilgandi.
2009—2018-yillar davomida Madridda fantastik natijalar ko‘rsatgan Krishtianu 450 ta golni o‘z hisobiga yozdirib qo‘ygan. “El-Klasiko”larda Ronaldu 9 ta golini ligada, 5 tasini kubok o‘yinlarida va yana 4 tasini Ispaniya Superkubogida urgan.
Lionel Messi (“Barselona”) — 26 ta gol
Argentinalik tirik afsona klasikolarda “Real”ni ayab o‘tirmagan. Messi “Real”ga qarshi 45 ta o‘yin o‘tkazgan. 18 ta gol La Ligada, 6 tasi Superkubokda va yana 2 ta Chempionlar Ligasida urilgan. Biroq Messi Ispaniya Kubogida Madrid darvozasini ishg‘ol qilolmagan.
“Barselona” tarixidagi birinchi raqamli futbolchiga aylangan Messi 2004—2021-yillar davomida katalonlar safida qo‘lga kiritish mumkin bo‘lgan barcha sovrinlarga ega chiqdi va 630 ta gol urdi.
Bonus
Karim Benzema (“Real Madrid”) — 13 ta gol
Yuqoridagi futbolchilar natijasini ortda qoldirishi mumkin bo‘lgan o‘yinchi Benzema bo‘lib turibdi. So‘nggi yillarda kuchli o‘yin namoyish qilayotgan Karim ikki jamoa safidagi aktiv futbolchilar orasida klasikolardagi eng yaxshi to‘purar bo‘lib turibdi. U Ispaniya Kubogida katalonlarga bir marta gol urgan (La Liga — 8, Superkubok — 4) va bugun ushbu ko‘rsatkichni yangilash imkoniyatiga ega.
Izoh (0)