Fobiya va g‘ayrioddiy qo‘rquvini yenga olmayotgan Gollivud yulduzlari

Har bir insonda biror narsadan qo‘rquv hissi bor. Qo‘rqish bu tabiiy hissiyot bo‘lib, inson va hayvonlarda o‘z hayotini saqlab qolish instinktini faollashtirib, himoya qilish qobiliyatini ishga tushiradi.

Hatto mashhur va badavlat insonlar ham bundan mustasno emas. Bugungi qahramonlarimiz qorong‘ilik, balandliklar va yopiq joylardan qo‘rqishi haqida emas, balki qiziqarliroq hislari bilan bo‘lishadi.

Rianna

Barbadoslik xonandaga akvarium sovg‘a qila ko‘rmang. Rianna bolaligidan ixtiofobiyadan aziyat chekadi, shuning uchun u hech qachon dengiz yoki okeanga sho‘ng‘ishga rozi bo‘lmaydi. Xonanda har qanday turdagi dengiz jonzotlari va baliqlardan qo‘rqadi.

“Bir kuni bolaligimda dengizda suzayotgan edim, so‘ng atrofimda suzib yurgan baliqlarga ko‘zim tushdi va menda vahima boshlandi. O‘sha kundan beri baliqlardan qo‘rqaman”, — deya tan oladi qo‘shiqchi.

Aktrisa “Nemoni izlab” animatsion filmini ko‘rmagani ma’qul...

Charli Hannem

Britaniyalik aktyor Charlz Hannem ham g‘ayrioddiy fobiyaga ega. U mikroblar va kirlikdan qattiq qo‘rqadi. Bunday fobiya maktabda boshlang‘ich sinfda o‘qib yurgan kezlari boshlangan: aktyor yashagan shaharda insonlarning ko‘rish qobiliyatiga salbiy ta’sir qiluvchi infeksiya tarqalgan. Yosh Charli shunchalik qo‘rqib ketganki, bugungi kunda ham aktyor uydan antiseptiksiz chiqmaydi, jamoat joylaridan qochichga urinadi.

“Bolaligimdan doimo germafob bo‘lganman. O‘ta tozalikka rioya qilaman va tanimagan insonlarim bilan yaqin aloqada bo‘lmayman”, — deydi Hannem.

Zendeya

Zendeya aktyorlik faoliyati bilan cheklanmaslikka qaror qildi. U rejissyorlik kursisida o‘tirishni orzu qiladi. Yosh aktrisa Denis Vilnyov va Luka Guadaninyo kabi mashhur aktyorlar bilan ishlagach, uning o‘z qobiliyatiga bo‘lgan ishonchi biroz susaydi. Endilikda u ko‘plab tomoshabinlar uchun manzur bo‘ladigan filmni suratga ololmay qolishidan qo‘rqadi.

“Rejissyorlikka qadam tashlashimga to‘sqinlik qiladigan yagona narsa — bu o‘zimni doimiy tanqid qilishim va kuchimga bo‘lgan ishonchim komil emasligidir. Men havas bilan kuzatadigan Gollivud namoyondalaridek buyuk inson bo‘la olmayman, deb qo‘rqaman. Agar men ushbu ichki ovozni yenga olsam, ehtimol, rejissyor bo‘lishim mumkin”, — deya Zendeya o‘z fikrlari bilan o‘rtoqlashdi.

Jonni Depp

Jonni Depp sirklarni yoqtirmaydi. Aktyorda eng keng tarqalgan fobiyalardan biri — masxarabozlar va grimmdan qo‘rquvi bor. “Alisa mo‘jizalar mamlakatida” va “Charli va shokolad fabrikasi” filmlarida suratga tushish fobiyani yengishga yordam bermadi.

“Bir kuni men dahshatli tushlar ko‘rdim! “Alisa mo‘jizalar mamlakatida” filmini suratga olish kunlarida o‘zga sayyoraliklar meni Gollivud shon-sharaf xiyobonidan o‘g‘irlab ketishdi!” — deya so‘zlab berdi Depp.

Ed Shiran

Ba’zi yulduzlar vaqt o‘tishi bilan insonlarning salbiy fikrlari va nafratiga o‘rganib qoladi va parvo qilmay qo‘yadi. Ammo aktyor Ed Shiran, aksincha, uni yoqtirmaydiganlardan va turli tanqidlardan juda qo‘rqadi. Salbiy fikrlar sababli Ed hatto Twitter’dagi akkauntini yuritishni to‘xtatib qo‘ydi. Bir vaqtlar xonanda “Taxtlar o‘yini” filmida suratga tushgani uchun bir nechta muxlislar uni yomon ko‘rib qolgan.

“Insonlar yo mendan nafratlanadi va boshqa hech qachon qo‘shiq aytmasligimni istaydi, yoki ijodimga katta hurmat bilan qaraydi. Bunday keskinlik meni qo‘rqitadi. Albatta, mening qo‘shiqlarim hammaga yoqishi shart emas, ammo shunday bo‘lsa-da, hech qachon ko‘rmagan va suhbat qurmagan begona insonni shunchaki yomon ko‘radiganlarni tushunmayman. Millionlab odamlar sizning muvaffaqiyatsizlikka uchrashingizni xohlashi juda qo‘rqinchlidir”, — deydi xonanda.

Teylor Svift

Teylor Svift ham shunga o‘xshash muammoga ega. Qo‘shiqchi yomon niyatli shaxslar uni aldashi yoki tuzoqqa tushirishidan qo‘rqadi. Teylorning aytishicha, birgina harakati tufayli g‘araz niyatli kishilar uni panjara ortiga qo‘yishi ham mumkin, shuning uchun Svift uydan iloji boricha kamroq chiqishga harakat qiladi.

“Men bir necha kunlar davomida uydan chiqmay o‘tirishim mumkin. Yangi kvartira sotib olganim yoki men hech qachon ko‘rmagan yigit bilan uchrashganim haqidagi turli xabarlarni menga qarshi ishlatishlari va men qilmagan jinoyatda ayblashlari mumkin”, — deya qo‘rquvini izohlab berdi Teylor.

Shuningdek, xonanda uning suhbatlarini uchinchi shaxslar eshitib turishidan qo‘rqadi. Shu sababli uyidagi har bir xonani kameralardan holi ekanligini tekshiradi va o‘zining xavfsizligiga jiddiy ahamiyat beradi.