Meksika Kongressida “o‘zga sayyoraliklar”ga tegishli bo‘lgan ikkita jasad namoyish qilindi. Bu haqda Euronews xabar berdi.
Jurnalist va noma’lum uchar jismlar tadqiqotchisi Xeymi Mausanga ko‘ra, jasad namunalari ming yillikdan oshadi va Peruning Kusko shahrida topilgan. Mausan tomonidan tashkil etilgan tegishli tadbir AQSH rasmiylari va Meksika hukumati a’zolarining e’tiborini tortgan. Ommaviy muhokamada Mausan “NUJlar va noma’lum anomaliyalar”ning bir nechta videolarini ko‘rsatgan va o‘zga sayyoraliklar deb taxmin qilingan jasadlarni namoyish qilgan.
Uning so‘zlariga ko‘ra, ular konlardan topilgan, diatom suvo‘tlari bilan o‘ralgan va keyinchalik toshga aylangan.
Meksika milliy avtonom universiteti (UNAM) olimlari ushbu namunalarni o‘rganib chiqqan va radiokarbonlarni aniqlash yordamida DNK dalillarini olishga muvaffaq bo‘lgan. Odamlarniki bilan solishtirganda DNKning 30 foizdan ortig‘i “noma’lum” ekani aniqlangan. “O‘zga sayyoraliklar”ning qo‘llari uch barmoqli, bo‘yni cho‘zilgan, bosh suyagi uzun. Ularning tishlari yo‘q edi va suyaklari esa qushlarniki kabi yengil ekani aytilmoqda.
Shuni ta’kidlash joizki, Xeymi Mausanning avvalgi NUJ bo‘yicha kashfiyotlari soxta bo‘lib chiqqan. Misol uchun, 2017-yilda u aslida inson bolalari hisoblangan beshta mumiyoni namoyish qilgan.
Izoh (0)