АҚШ Марказий разведка бошқармаси (МРБ) совет аскарлари номаълум учар жисмлар тарқатган нурдан тошга айланиб, ҳалок бўлгани ҳақидаги ҳисоботини эълон қилди. Махфийликдан чиқарилган ҳужжат бошқарма веб-сайтида эълон қилинди.
Хабарга кўра, 1991 йилда Совет Иттифоқи парчалангани ва Михаил Горбачёв истеъфога чиққанидан кейин АҚШ разведкаси КГБнинг кўплаб материалларини, жумладан, Сибирдаги ҳарбий қисмга номаълум учар жисм ҳужуми ҳақидаги 250 саҳифали файлни олган.
Файлда нафақат ҳужжатли фотосуратлар ва чизмалар, балки воқеа гувоҳларининг кўрсатмалари ҳам бўлган. Жумладан, 1989—1990 йилларда совет ҳарбий объектларидан бири устида ликопча кўринишидаги номаълум учар жисм пайдо бўлган. Унга “ер-ҳаво” синфидаги ракета билан зарба берилган. Шундан сўнг объект ерга қулаб тушган, ундан гўёки “катта бошли ва катта қора кўзли” бешта кичик гуманоид чиққан.
Омон қолган икки аскарнинг гувоҳлик беришича, келгиндилар бир-бирига яқинлашиб, овал шаклидаги “бир жисмга” айланган ва у ҳуштак чалиб, ёрқин оқ нур тарата бошлаган. Бир неча сониядан сўнг у янада ёрқинлашган ва ёниб кетган. Шу пайт воқеани кузатиб турган 23 нафар аскар тош устунга айланиб қолган. Фақат иккита аскар тирик қолган, чунки улар сояда турган ва чақнашдан таъсирланмаган.
Ҳисоботда таъкидланишича, номаълум учар жисм ва “тош қотган аскарлар” қолдиқлари Москва яқинидаги махфий илмий-тадқиқот институтига олиб кетилган. Разведка вакилининг айтишича, агар бу маълумотлар ҳақиқатга тўғри келса, ҳодиса ўта хавфли ҳолатдир.
Сибирдаги ҳодиса ҳақида аввал ҳеч қандай расмий хабар берилмаган. Ҳисоботда маълумот манбаи сифатида “Тернопол оқшоми” газетасининг “Космик қасос” сарлавҳаси остида қайта чоп этилган мақола кўрсатилган.
Изоҳ (0)