Yoz fasli kechalarini oila davrasida barcha uchun birdek manzur bo‘ladigan qiziqarli filmlar bilan o‘tkazishni tavsiya etamiz.
“Kosmosdan kelgan ovoz” (Wow! Nachricht aus dem All)
Germaniya, 2023-yil
Annabel va Dino ismli do‘stlar astronomiyasiz hayotini tasavvur eta olmaydi. Yosh tadqiqotchilar o‘z tajribalari davomida koinotdan sirli xabar: oladi bolalar o‘zga sayyoraliklar Yer bilan aloqa o‘rnatishga urinayotganiga amin bo‘ladi. Ammo dunyoda mo‘jizalar borligiga ishonchi yo‘qolgan kattalar bunga ishonmaydi.
Annabel va Dino kosmodromga ekskursiya qiladi hamda u yerda sayyoramizga boshqa olamdan kelib qolgan va havoda muallaq turuvchi toshni topib oladi. Do‘stlar butun galaktikada yerdan tashqari boshqa sayyoralarda ham hayot mavjudligini isbotlash uchun toshni o‘g‘irlashga qaror qiladi. Biroq ularning rejasi amalga oshmaydi va kosmodromni tark etishga urinayotgan vaqtda tasodifan kosmik kemaga tushib qolgan bolalar orbitaga uchib ketadi. Bundan qo‘rqib ketmagan jasur bolalar imkoniyatdan foydalanishga qaror qiladi va o‘zga sayyoraliklarni izlash vaqtida ajoyib sarguzashtlarni boshdan o‘tkazadi.
“Gapga kirmaslar” (Непослушники)
Rossiya, 2024-yil
Tomoshabinlar tomonidan sevib ko‘rilgan filmning davomi (sikvel) bo‘lib, unda bosh qahramon Dima endi “Dimonstr” emas, avtosalonda savdo menejeri lavozimida ishlaydi, Sasha Chyorniy esa rohib.
Ibodatxonada hamma bolalar uyidan to‘rt nafar sho‘x va itoat etmaydigan bolalar olib kelingunga qadar tinchgina yashardi. Bolalar uyidan qayta va qayta qochish, mayda o‘g‘riliklar sababli bolalarni yetimxonadan ko‘ra qattiqqo‘lroq joyga yuborishga to‘g‘ri keladi. Tergovchi ularning hayotini barbod etishni istamaydi va to‘rtta bola — ikki qiz va ikki o‘g‘ilni Anatoliy ota qaramog‘iga topshiradi. Ammo bu qaror qanchalik to‘g‘ri ekanligi film davomida yoritiladi.
“Greysi va Pedro: to‘rt oyoqlilar sayohati” (Gracie and Pedro: Pets to the Rescue)
Kanada, 2024-yil
Pedro va Greysi bir oilaning sevimli uy hayvonlaridir. Sho‘x jonzotlar muntazam janjal qilib yuradi va turli xarakterga ega bo‘lgani uchun doimiy muammolarga duch keladi. Pedro — panjalarini kir qilishdan va xavf-xatardan qo‘rqmaydigan mushuk. Greysi — o‘zini haqiqiy aristokrat va kamyob nasldan deb hisoblaydigan mag‘rur it. Ularning egasi yangi shaharga ko‘chib o‘tish vaqtida uy hayvonlari saqlangan qafas qulfi ochilib, mushuk hamda it tashqariga chiqib ketadi. Uyga qaytish va oilasini izlab topish uchun qahramonlar xavf-xatarlarga to‘la murakkab yo‘lni bosib o‘tishlari lozim bo‘ladi. Bu orada Pedro va Greysi yangi do‘stlar orttiradi va xiyonatkor dushmanlarga qarshi uchrashadi. Shu tariqda ular bir jamoa bo‘lib yashashni o‘rganadi.
“Barcha bolalar kuchugi bo‘lishini orzu qiladi” (Каждый мечтает о собаке)
Rossiya, 2024-yil
Yurka ismli o‘n ikki yoshli maktab o‘quvchisi yangi do‘stlar orttirishni orzu qiladi. Uning sinfiga ikkita yangi o‘quvchi kelganidan so‘ng Yurkaning hayoti butkul o‘zgarib ketdi. Yangi sinfdosh aka va singillar taniqli uchuvchining farzandlari bo‘lib chiqadi. Ular yordamida Yurka haqiqiy do‘stlikni topadi va umrida ilk bor qiz bolani yoqtirib qoladi.
Mazkur filmdagi voqealar o‘tgan asrning 60-yillarida Moskva shahrida bo‘lib o‘tadi. Unda do‘stlik, mehr-shafqat, g‘amxo‘rlik kabi ezgu xislatlar ko‘rsatiladi. Bosh qahramon hayotida birinchi marta xiyonat va shafqatsizlikka duch keladi, lekin ayni paytda u hamdardlik va kechirimli bo‘lishni o‘rganadi.
Izoh (0)