Professional grim va pardoz ustalari filmlarda mo‘jizalar yaratib kelgan. Murakkab grim va protezlarda ishlash va rol ijro etish esa aktyorlar uchun doim ham oson bo’lmagan. Quyida mashhur filmlarda unutilmas obrazlarni gavdalantirishda grim tufayli jiddiy qiyinchilikka duch kelgan aktyorlarni ko‘rib chiqamiz.
“Garri Potter va maxfiy hujra” — Emma Uotson
Garri, Ron va Germiona Slizerindagi dushmanlar nayrangini fosh etish maqsadida qiyofani o‘zgartiruvchi sehrli ichimlik tayyorlaydi. Garri va Ron Goyl va Kreb qiyofasiga kiradi. Germiona esa o‘qituvchi Minevra MakGonagall o‘rniga uning mushugi qiyofasini oladi. Tasodifan qo‘l urgan xatosi tufayli u do‘stlari bilan birga dushman fakultetga bora olmaydi.
Dastlab Emma Uotsonning o‘zi mushuk obrazida ko‘rsatilishi lozim edi, biroq grim va yelim unda kuchli allergik reaksiya qo‘zg‘atdi va qisqa muddatli rolni dublyor o‘ynashiga to‘g‘ri keldi.
“Uzuklar hukmdori” — Brett Bitti
Brett Bitti ismini eshitganda ko‘pchilik muxlislar uning “Uzuklar hukmdori”iga qanday aloqasi bor, deya hayron qoladi. Aslida esa aktyor Jon Ris-Devisning dublyori bo‘lib, filmda Devisdan ham ko‘proq vaqt rol o‘ynaydi. Brett Bitti deyarli barcha jangovar sahnalarni ijro etgan va suratga olish mobaynida juda ko‘p jarohatlar olgan. Shuningdek, Brett kuniga 12 soatdan ortiq grim va yuz protezlarida yurgani sababli turli travmalar olgan. Ulardan eng og‘iri — bosh miyaning lat yeyishi bo‘lgan. Bunday jarohat protez va yuz orasidagi bo‘shliqda qon to‘planishiga, keyin esa u yorilib, favvoradek otilishiga olib kelgan. Brettning so‘zlariga ko‘ra, reallikda barchasi bundan-da yomonroq ko‘ringan edi.
“Dyuna” — Stellan Skarsgard
Stellan Skarsgard suratga olish maydonida o‘zini ayamaydigan aktyorlardandir. U “Karib dengizi qaroqchilari” filmida irlandiyalik dengizchi Bill Tyorner rolini o‘ynagan. Uning ta’sirli tashqi ko‘rinishi uchun 6 soatli grim mehnati ketgan.
Dyuna” filmidagi baron Vladimir Xarkonnen roli uchun esa aktyor 8 soat vaqt davomida grim qilingan. Maxsus kostyumning 40 kilogramm og‘irligi aktyorga nafas olishi va harakatlanishida murakkabliklarni keltirib chiqargan. Keyinchalik kostyum ichiga ventilyatsiya tizimi o‘rnatilgan.
Ammo muammolar hali tugamagan edi. Stellan qo‘rqinchli qora suyuqlikka sho‘ng‘igan kadrlarda kostyum tufayli cho‘kib ketishiga bir baxya qolgan. So‘ng murakkab grimga yana bir bor o‘zgartirishlar kiritilgan.
“Uzuklar hukmdori” — Orlando Blum
Britaniyalik aktyor Orlando Blum “Uzuklar hukmdori” trilogiyasidagi elf Legolas obrazida tomoshabinlar yodida qolgan. Syomka jarayonlarida aktyor yashil rangli linza taqib yurishi lozim edi, ammo linzalar ko‘zga nojo‘ya reaksiya berib, qizartirib yuborgan. Filmda muxlislar Legolas ba’zan jigarrang ko‘zlar bilan namoyon bo‘lganini sezib qolishgan. Bunday xatolik aktyor shikastlangan ko‘zlari to‘liq tiklanishga ulgurmay yana syomkaga qaytgani sababli yuz bergan.
“Robot politsiyachi” — Robert Jon Berk
Aktyor Piter Ueller “Robot politsiyachi” ning uchinchi qismida bosh rolni qayta ijro etishdan bosh tortganidan so‘ng, uning o‘rniga hamkasbidan balandroq aktyor Robert Jon Berk taklif qilingan. Muammo shunda ediki, kostyum Piter uchun maxsus ishlab chiqilgan, cho‘zilmas va bukilmas edi. Buning ustiga, og‘irligi deyarli 70 kilogramm va po‘latdan yasalgan kostyum yangi aktyorga ko‘plab noqulayliklar tug‘dirgan.
“Betmen va Robin” — Arnold Shvarsenegger
Amerikalik aktyor Arnold Shvarsenegger “Betmen va Robin” filmida janob Friz obrazini gavdalantirgan. 6 soatlik grim va noqulay kostyumdan tashqari aktyor og‘iz bo‘shlig‘ida ko‘k rangli chiroq porlashi uchun xavfli usuldan foydalanishga to‘g‘ri kelgan: Shvarsenegger og‘ziga diod fonarlar o‘rnatilgan, akkumulyatordan tomgan kislota og‘izni bir necha marta kuydirib yuborgan.
“Garri Potter va Azkaban mahbusi” — Pem Ferris
Filmda Garrining xolasi Marjori Dursl uning ota-onasini qattiq haqorat qiladi. Bunga chiday olmagan Garri unga sehr qo‘llaydi va bir necha soniyada Marjori katta sharga aylanib qoladi. Ko‘pchilik ushbu sahnani kompyuter grafikasi deb o‘ylagan bo‘lishi mumkin, ammo Pem Ferris haqiqiy shar kostyumini kiyib, rol o‘ynagan va suratga olish maydonida hushidan ketgan.
“Grinch — Rojdestvo o‘g‘risi” — Jim Kerri
Mazkur oilaviy film grim mutaxassisi emas, balki vizajist rassom tomonidan yaratilgan ajoyib obraz namunasidir. Yaponiyalik grim ustasi Kadzuxiro Tsudzi aktyor Jim Kerrini 8 soat mobaynida makiyaj qilar edi. Biroq Kerriga uzoq vaqt stulda o‘tirish yoqmas edi, hattoki aktyor suratga olish maydonini janjal bilan tark etgan paytlar ham bo‘lgan. Bunday muhitda ishlashni istamagan Kadzuxiro ham syomkadan ketib qolgan. Keyinchalik rejissyor Ron Xovard ularni qaytarishga muvaffaq bo‘lgan.
Izoh (0)