Personajning kiyim-kechagi filmning muhim qismi bo‘lib, tomoshabinlar buni ko‘pincha e’tibordan chetda qoldiradi. Ammo bu xato. Kiyim dizaynerlari o‘z ishlariga syujetni chuqurroq anglashga yoki qahramonning xarakterini tushunishga yordam beradigan yashirin ma’nolarni singdiradilar.
“Titanik”
Libos dizayneri Debora Linn Skottning fikricha, bosh qahramon ko‘ylaklarining ranglari tomoshabinga Rouzning xarakter xususiyatlarini ochib berishi lozim edi. Chunonchi, qora yarim shaffof to‘r bilan qoplangan yorqin qizil ko‘ylak qizning ehtirosli va o‘jar tabiatini ko‘rsatadi, biroq u amal qilishga majbur bo‘lgan qat’iy ijtimoiy me’yorlar bilan cheklangan. Ammo qahramonning liboslari haqidagi hikoya faqat shugina emas.
Yakuniy sahnada Rouz yana “Titanik”da paydo bo‘ladi, biroq bu safar oq libosda. E’tiborli jihati shundaki, bu libosning dizayni va bichimi Rouz Jek bilan ilk bor uchrashganida kiygan qizil ko‘ylakka aynan o‘xshaydi. Bu esa bizga qahramonlar va ularning muhabbati yo‘lida endi hech qanday to‘siq qolmaganini anglatadi.
“Garri Potter va qaqnus ordeni”
“Garri Potter”ni o‘qiganlar Nimfadora Tonksning sochlari saqichday pushti rangda bo‘lganini eslaydi. Biroq film yaratuvchilari qahramonning sochlarini to‘q binafsha rangga bo‘yashga qaror qilishdi. Buning sababi shundaki, tomoshabinlarda mustahkam assotsiatsiya hosil bo‘lishi kerak edi: pushti rangni yovuz shaxs kiyadi. Va bu rang bilan personaj o‘rtasidagi bog‘liqlik haqiqatan ham ongimizda chuqur o‘rnashib qoladi.
Sehrgarlik vazirining yordamchisi va qora kuchlardan himoyalanish fani o‘qituvchisi Dolores Ambrij pushti rangni har qanday ko‘rinishda yaxshi ko‘radi. Qiziq qonuniyat: professor Ambrij qanchalik g‘azablansa, uning kiyimlaridagi pushti rang shunchalik yorqinroq tusga kiradi.
“Kichik xonimlar”
Filmning boshidan oxirigacha Lori va Jo bir xil nimcha kiyib yurishadi. Bu ularning o‘rtasidagi alohida rishtani ko‘rsatish maqsadida o‘ylab topilgandi. Bundan tashqari, liboslar bo‘yicha rassom Jaklin Dyurran aktrisa Sirsha Ronan bilan hamkorlikda Jo uchun ramziy kiyim-kechak yaratdi. Qiz roman yozayotgan paytda doimo yashil harbiy kamzul kiyib oladi, bu uning qat’iyatli va kuchli ruhiyatini ifodalaydi.
“Suvning shakli”
Filmdagi Elayza dastlab hech kim bilan so‘zlashmaydigan, rangsiz kiyimlar kiygan va ko‘zga tashlanmaydigan ayol sifatida tasvirlanadi. Biroq Elayza amfibiya odam bilan uchrashgach, hamma narsa o‘zgaradi. Ayol unga oshiq bo‘ladi va bu yangi his-tuyg‘u jimgina yuruvchi farroshni qanday o‘zgartirayotganini ko‘ramiz. Elayza qizil rangdagi kiyimlar kiyishni boshlaydi, bu uning ehtirosli tabiatidan darak beradi.
“Yozning 500 kuni”
Dastlabki titrlardayoq, Tom va Sammerning bolalik kadrlari ko‘rsatilganda, qahramonlarga ikki xil rang biriktirilganini ko‘rish mumkin: jigarrang — Tom uchun, ko‘k — Sammer uchun. Sammer Tom hayotining bir qismiga aylangach, uning atrofida darhol ko‘plab moviy va ko‘k ranglar paydo bo‘ladi. Misol uchun, qahramon moviy kiyimdagi odamlar qurshovida baxtli raqs tushayotgan epizodda. Shu tarzda biz Tom ayni paytda faqat sevgilisi haqida o‘ylayotganini tushunamiz.
“Alovuddin”
Yangi filmda malika Jasminning ko‘plab ajoyib liboslari namoyish etiladi, ular tomoshabinlarga qahramonning o‘ziga xos xususiyatlarini ochib beradi. Malikaning an’anaviy yorqin feruza libosiga endi nozik munchoqlar bilan nafis kashta tikilgan. Pardada tovus tasviri berilgan, bu bejiz emas. Bu chuqur ma’noli ramziy ifoda: qirol bog‘ida tutqunlikda qolgan tovus malika singari ozodlikka intiladi.
“Temir xonim”
Meril Strip Margaret Tetcher qiyofasida hokimiyat va jamiyatdagi barqaror mavqeyini ko‘rsatishi kerak bo‘lganda nafis bichilgan ikki qismli kostyum, marvarid va bantli bluzka kiyadi. Eng muhim sahnalarda bu ta’sir qahramonning sevimli rangi — ko‘k tus hisobiga yanada kuchayadi. Tetcher bosh vazirlik lavozimini tark etishga majbur bo‘lganida u birinchi marta qizil rangli kostyum kiyadi. Bir tomondan, u shu tarzda o‘zining kuchli va o‘jar tabiatini hamda kurashni davom ettirishga tayyorligini bildiradi. Boshqa tomondan, bunday libos qahramonning endi vaziyatni nazorat qila olmasligiga ishora qiladi.
“Sumerki”
“Sumerki” asarining muallifi Stefani Mayer kitoblarida Kallenlarning oilaviy gerbi haqida hech narsa aytmagan. Biroq film yaratuvchilari bu qahramonlar uchun oila eng muhim qadriyat ekanligini ko‘rsatish maqsadida vampirlar qiyofasiga gerb tasviri tushirilgan aksessuarlarni qo‘shishga qaror qilishdi. Emmet, Jasper va Edvard o‘ng qo‘liga charm bilaguzuk taqishgan. Rozali katta taqinchoqni, Elis esa marjonni ma’qul ko‘radi. Karlayl chap qo‘liga o‘yma naqshli kumush uzuk taqqan bo‘lsa, Esme kumush bilaguzuk taqib olgan.
“Qindan chiqqan pichoqlar”
Ransom boylik va erkka o‘rganib qolgan yigit bo‘lib, qimmatbaho kiyimlariga e’tibor berishni xayoliga ham keltirmaydi. Uning kiyimlari achinarli holatda ekanini ko‘ramiz: och jigarrang sviterida katta-katta yirtiqlar bor, yeng uchlari va yoqasi ham tang ahvolda. Bu orqali bizga Ransomning o‘ziga xos shaxsiyatini ko‘rsatmoqchi bo‘lishgan — u na pulni, na unga bu pulni berayotgan odamlarni, ya’ni o‘z oilasini hurmat qiladi.
“Grand Budapesht mehmonxonasi”
Madam Selin Vilnev Degoff-und-Taksis xonimning kiyimlarida tarixning turli davrlari ataylab birlashtirilgan. Uning qizil paltosi va shlyapasi 20-yillardan, ko‘ylagi 30-yillar boshidan, soch turmagi esa to‘g‘ridan to‘g‘ri G‘aroyib davrdan olingan. Uslublarning bunday qorishmasi D. xonimning o‘tmishdan qutula olmasligini ifodalaydi, shuningdek, qahramonning ozgina aqldan ozganini ham ko‘rsatadi.
Izoh (0)