Isroil Falastin tufayli London bilan hamkorlikni to‘xtatishi mumkin — Times

Isroil agar London Falastinni tan olsa u bilan mudofaa va xavfsizlik sohasidagi hamkorlikni to‘xtatish imkoniyatini ko‘rib chiqmoqda. Bu haqda diplomatik manbalarga asoslanib The Times nashri xabar bermoqda.

Manbalarga ko‘ra, Isroil bosh vaziri Binyamin Netanyaxu hukumati, agar Buyuk Britaniya kelgusi oyda Falastinni tan olish jarayonini davom ettirsa, bu javobni variantlardan biri sifatida ko‘rib chiqmoqda.

“London ehtiyotkor bo‘lishi kerak, chunki Bibi (Netanyaxu) va uning vazirlarida foydalanishi mumkin bo‘lgan ko‘plab imkoniyatlar bor. Isroil Buyuk Britaniya bilan hamkorlikni qadrlaydigan bo‘lsa-da, so‘nggi qarorlar uning bosim ostida ekanini ko‘rsatadi. Agar Isroil hukumati javob choralarini qo‘llashga qaror qilsa, Buyuk Britaniya ko‘p narsani yo‘qotishi mumkin”, deydi manba.

Nashrning yozishicha, so‘nggi ikki yil ichida Isroil razvedkasi Britaniya maxsus xizmatlariga tahdidlar haqidagi eng muhim ma’lumotlarni taqdim etgan. Xususan, Isroilning “Mossad” tashqi razvedka xizmati britaniyalik hamkasblariga muhim ma’lumotlarni yetkazgan, bu esa Londondagi Isroil elchixonasiga qarshi Eron bilan bog‘liq bo‘lgan taxmin qilingan teraktning oldini olishga yordam bergan. Bu Buyuk Britaniyada so‘nggi yillardagi ikkita eng yirik aksilterror operatsiyasiga olib kelgan.

“Shuningdek, Birlashgan Qirollik Iroq va Afg‘onistondagi razvedka operatsiyalari uchun Isroil tomonidan ishlab chiqarilgan dronlardan foydalangan, Isroil mudofaa uskunalari esa har ikki davlat bilan bo‘lgan harbiy mojarolar paytida britaniyalik askarlarning hayotini saqlab qolgan”, deb ta’kidlanadi nashrda.

Bundan avval Buyuk Britaniya agar Isroil G‘azo sektoriga insonparvarlik yordamini yetkazib berishni to‘xtatishda davom etsa va anklavdagi harbiy operatsiyani tugatmasa, sentyabrda BMT Bosh assambleyasi sessiyasi boshlanishidan oldin Falastin davlatini tan olishga tayyorligini bildirgandi.

Shuningdek, Fransiya prezidenti Emmanuel Makron sentyabr oyida bo‘lib o‘tadigan BMT Bosh assambleyasi sessiyasida mamlakat Falastin davlatini rasman tan olishini e’lon qilgandi.