Xitoyda chivin chaqishi orqali yuqadigan chikungunya virusi Tayvanda ham qayd etildi. Bu haqda Al Jazeera xabar berdi.
So‘nggi haftalarda virus Xitoyning janubidagi Foshan shahrida tez tarqalmoqda. Kasallanganlar soni allaqachon 8 mingdan oshgan. Virus odatda yuqori isitma va kuchli bo‘g‘im og‘rig‘i bilan kechadi.
Tayvanda chikungunya ilk bor 30-iyul kuni Foshandan qaytgan ayolda aniqlangan. Bu 2025-yilda qayd etilgan birinchi holatdir. Avvalroq Indoneziya, Filippin va Shri Lankada o‘ndan ortiq bemor aniqlangandi. Tayvan hukumati fuqarolarni epidemiya o‘chog‘i bo‘lgan Xitoyning Guandun provinsiyasiga bormaslikka chaqirdi. Sayyohlardan “kuchaytirilgan ehtiyot choralariga” rioya qilish so‘raldi.
Virus yuqori isitma, toshma, bosh og‘rig‘i, ko‘ngil aynishi, yetti kungacha davom etadigan charchoq hamda mushak va bo‘g‘imlarda bir necha hafta davom etadigan og‘riqlarga sabab bo‘lishi mumkin.
Foshan va Guandun provinsiyasi atrofidagi hududlarda epidemiya Xitoy uchun misli ko‘rilmagan darajada tez va keng ko‘lamda avj oldi, deydi Wellcome Sanger institutida virusni kuzatuvchi britaniyalik yetakchi Rojer Xyuson.
Kuchli yog‘ingarchilik va yuqori harorat Xitoydagi vaziyatni yanada murakkablashtirmoqda. Rasmiylar dronlar yordamida chivin tuxum qo‘yadigan turg‘un suvlarni aniqlamoqda. Tashqaridagi suv idishlarini bo‘shatmagan fuqarolar 10 ming yuan (taxminan 1,4 ming dollar)gacha jarimaga tortilishi va elektr ta’minotidan uzilishi mumkin.
Aholi chivinlardan himoyalanish uchun to‘r va boshqa vositalardan foydalanmoqda. Virusga chalingan bemorlar esa kamida bir hafta shifoxonada davolanmoqda.
Izoh (0)