Janubiy Koreya iyun oyi boshida yirik o‘rmon yong‘inlaridan jabr ko‘rgan Abay viloyatidagi o‘rmonni tiklashga yordam beradi. Bu haqda NUR.kz xabar berdi.
Qozog‘iston delegatsiyasining Seulga tashrifi chog‘ida deputat Yedil Janbirshin Janubiy Koreyaning o‘rmonlarni qayta tiklash bo‘yicha katta tajribasi borligini ta’kidlab, undan Qozog‘istonda foydalanishni taklif qildi.
Osiyo o‘rmon xo‘jaligi bo‘yicha hamkorlik tashkiloti AFoCO vitse-prezidenti Abay viloyatidagi o‘rmonni tiklashda yordam berishga tayyorligini bildirdi.
“50-60 yillarda Koreyada o‘rmonlarni tiklash maqsadida 11 milliard daraxt ekildi, 2,5 million gektar yer tiklandi. Bu borada Koreyaga mazkur boy tajribadan biz bilan foydalanishni taklif qildik”, – dedi deputat Yedil Janbirshin.
Ma’lum qilinishicha, tomonlar o‘quv mashg‘ulotlarini o‘tkazish yoki qozog‘istonliklarni amaliyotga taklif etish masalalarini ham muhokama qilgan.
Qozog‘istondagi o‘rmon yong‘ini
Respublikaning Rossiya bilan chegaradosh Abay viloyatidagi o‘rmon yong‘inlari 8-iyun kuni boshlandi. Yong‘in maydoni 60 ming gektardan oshdi. Ushbu yong‘in oqibatida jami 14 kishi halok bo‘ldi, ular xotirasiga 12-iyun kuni Qozog‘istonda umummilliy motam kuni deb e’lon qilindi.
Shundan so‘ng yana bir qurbonning jasadi topildi va yong‘in qurbonlari soni 15 kishiga yetdi. 14-iyun kuni Abay viloyatidagi o‘rmon yong‘inlari o‘rab olindi.
Qozog‘iston prezidenti bo‘lib o‘tgan voqea uchun qurbonlarning oilasidan uzr so‘radi va aybdorlar javobgarlikka tortilishini aytdi. U qurbonlarning oilasiga moddiy yordam ko‘rsatilishini bildirdi. Keyinchalik To‘qayev bilan uchrashgan yong‘in qurbonlarining qarindoshlari aslida begona ekani haqida xabar tarqaldi, biroq bunga rasmiy munosabat bildirilmadi.
O‘z navbatida, Shavkat Mirziyoyev yirik o‘rmon yong‘inlari munosabati bilan Qozog‘iston prezidentiga ta’ziya yo‘lladi. Prezident qurbon bo‘lganlarning oila a’zolari va yaqinlariga chuqur hamdardlik bildirdi.
Izoh (0)