Hindistondagi Next on Netflix 2025 marosimida media platforma tomonidan namoyish etiladigan yangi Bollivud filmlari bilan tanishuv marosimi bo‘lib o‘tdi. Unda Aryan Xon, Ibrohim Ali Xon va boshqa ko‘plab yosh va iste’dodli aktyorlar ishtirok etdi. Quyida joriy yilda premyerasi kutilayotgan hind filmlarining ro‘yxati va ularning qisqacha tavsifi bilan tanishtiramiz.
“Javohirlar o‘g‘risi: hujum boshlandi” (“Jewel Thief: The Heist Begins”)
Janr: Sarguzasht, Triller
Rejissyor: Siddharth Anand
Rollarda: Saif Ali Xon, Jaidip Ahlavot
Syujet: Film yirik o‘g‘rilik voqeasi haqida bo‘lib, unda Saif Ali Xon va Jaydip Axlavot bosh rollarni ijro etadi. Unda qimmatbaho “alvon quyosh” nomli noyob tosh haqida so‘z boradi. Bosh qahramonlar tajribali o‘g‘rilar bo‘lib, murakkab reja asosida uni qo‘lga kiritishga harakat qiladi, ammo ularning yo‘lida kutilmagan to‘siqlar, xiyonatlar va xavfli burilishlar paydo bo‘ladi.
“Xuddi sen kabi” (“Aap Jaisa Koi”)
Janr: Romantik drama
Rejissyor: Karan Soni
Prodyuserlar: Karan Johar, Apoorva Mehta, Somen Mishra
Rollarda: Fatima Sana Shaih, R. Madhavan
Syujet: Ushbu romantik dramada ikki qarama-qarshi xarakterga ega insonlarning sevgi hikoyasi tasvirlanadi. Film bosh qahramonlari Shrirenu Tripathi (Fatima Sana Shaih) va Madhu Bose (R. Madhavan) – butunlay farq qiladigan turli dunyolardan bo‘lgan ikki inson. Ularning hayotiy qarashlari, orzulari va odatlari bir-biridan keskin ajralib turadi. Biroq taqdir ularni kutilmaganda uchrashtirib, o‘zaro yaqinlashtiradi. Film hayotiy vaziyatlar, kulgili sahnalar va samimiy tuyg‘ular orqali tomoshabinni o‘ziga tortadi.
“Shovqin-suron” (“Dhoom Dhaam”)
Janr: Romantik, jangari
Rejissyor: Rishab Seth
Rollarda: Yami Gautam, Pratik Gandi
Syujet: Filmda bir-biriga o‘xshamas ikki yoshning sarguzashtli hikoyasi tasvirlanadi. Uyatchan va onasining so‘zidan chiqmaydigan yigit hamda jasur va qo‘rqmas qiz o‘zlarining to‘y kechasida kutilmaganda xavfli jinoyatchilar ta’qibi ostida qoladi. Ular butun tun davomida quvg‘in va hayajonli voqealar girdobida qolishadi. Jinoyatchilarning asosiy maqsadi sirli “Charli” ismli shaxsni topish, bu esa butun sarguzashtning kalitiga aylanadi. Qahramonlar bir-birlarini yaxshi tushunmagan holda, hayotlarini saqlab qolish va o‘zaro his-tuyg‘ularini anglab yetish uchun kurashadilar. Filmda jangari sahnalar, komedik lahzalar va romantik burilishlar uyg‘unlashgan bo‘lib, u tomoshabinlarga hayajonli va zavqli tajriba taqdim etadi.
“Soddadil qalblar” (“Nadaaniyan”)
Janr: Romantik komediya
Rejissyor: Shona Gautam
Rollarda: Ibrohim Ali Xon, Khushi Kapur
Syujet: Film boy oiladan chiqqan Janubiy Dehlilik qiz va oddiy, o‘rtahol oiladan kelgan tirishqoq yigit o‘rtasidagi shirin va qiziqarli romantik voqeani tasvirlaydi. Qahramon qiz o‘zining do‘stlari oldida mukammal hayot kechirayotgani haqida taassurot qoldirish uchun yigitni “soxta qalliq” sifatida yollaydi. Biroq vaqt o‘tishi bilan o‘yinga haqiqiy his-tuyg‘ular aralasha boshlaydi.
Film sevgining kutilmagan yo‘llar bilan kelishi, turli tabaqalar va hayot tarzi farqlari fonida insoniy munosabatlarning o‘zgarishini aks ettiradi.
“Test”
Janr: Drama, sport
Rejissyor: S. Shashikant
Rollarda: Siddhart, R. Madhavan, Nayantara
Syujet: Film hayot va sport o‘rtasidagi bog‘liqlik va kurash haqida hikoya qiladi. Unda inson hayoti va uning tanlovlari kriket o‘yini bilan bog‘lanib ketgan dramatik voqealar tasvirlanadi. Qahramonlar sevgisi, orzulari va qarorlarini sinovdan o‘tkazadigan muhim daqiqalarga duch keladi.
“Toster” (“Toaster”)
Janr: Komediya, drama
Rejissyor: Vivek Dashodxari
Rollarda: Rajkummar Rao, Sanya Malhotra
Syujet: Film oddiy oshxona jihozi — toster bilan bog‘liq qiziqarli, kulgili va kutilmagan burilishlarga boy film. Bu shunchaki non qizdiradigan moslama emas, balki bir nechta inson taqdirini bog‘lovchi sirli va obyektga aylanadi. Filmda turli xarakterdagi odamlarning hayoti kesishadi va bu oddiy maishiy jihoz ular uchun muhim sirlarni fosh qilish, kelajak taqdirini belgilash va yangi imkoniyatlar eshigini ochish vositasiga aylanadi. Har bir qahramonning o‘z hikoyasi va kelajakdagi rejalari bo‘ladi ammo hammasi bir nuqtada — toster bilan bog‘liq syujet chizig‘ida birlashadi.
“Katta opa” (“Akka”)
Janr: Triller, drama
Rejissyor: Dharmaraj Shetti
Rollarda: Kirthi Suresh, Radhika Apte, Tanvi Azmi
Syujet: Film 1980-yillar janubiy Hindistonda joylashgan xayoliy Pernuru shahrida sodir bo‘ladigan voqealarni tasvirlaydi. Bu joyda matriarxat jamiyati hukm suradi, ya’ni ayollar jamiyatning asosiy boshqaruvchilari hisoblanadi.
Asosiy e’tibor “Akka” — ya’ni “katta opa” degan unvonga ega bo‘lgan ayol rahbarlarga qaratiladi. Ular mafiya dunyosida o‘z qoidalariga ega bo‘ladi va butun shaharni nazorat qiladi. Biroq tashqaridan kelgan tahdid mamlakatdagi muvozanatni buzadi va kuchli ayollar o‘z hukmronligini saqlab qolish uchun shafqatsiz kurashga kirishadi. Film ayollar kuchi, hokimiyat uchun kurash va omon qolish haqida hikoya qiladi. Qahramonlar shaxsiy ambitsiyalar va jamoat manfaatlari o‘rtasida tanlov qilishga majbur bo‘ladi.
Izoh (0)