Janubiy Kaliforniyaning millionlab aholisi yong‘in xavfi yuqori bo‘lgan ob-havoning navbatdagi to‘lqini bashoratidan va ikkita halokatli yong‘in oqibatida kamida 25 kishi halok bo‘lib, minglab uylar vayron bo‘lgan hududda e’lon qilingan o‘ta xavfli vaziyat haqidagi ogohlantirish tufayli tashvishli kutish holatida turibdi.
Ma’lum bo‘lishicha, 14-yanvar kuni shamolning kutilmaganda pasayishi o‘t o‘chiruvchilarga vaqtinchalik yengillik bergan. Bu ularga Los Anjelesdagi ikkita yirik yong‘inni o‘chirishda muvaffaqiyatga erishish va bir nechta yangi yong‘in o‘choqlarini tezda bartaraf etish imkonini yaratdi.
Milliy ob-havo xizmati yuqori harorat, past namlik va kuchli shamol birga kelganda e’lon qilinadigan o‘ta xavfli vaziyat haqida ogohlantirish e’lon qildi. Ogohlantirish kechasi soat 3 dan kunduzi soat 3 gacha amal qiladi, u Markaziy qirg‘oqdan Meksika bilan chegaragacha bo‘lgan 440 kilometrga yaqin hududni qamrab oladi. Alohida xavfli hududlarga Los Anjeles va Ventura okruglarining bir qismi kiradi.
“Asosiy xabar shuki, xavf hali o‘tgani yo‘q. Bugun shamol pasaydi, ammo ertaga u yana kuchayishi mumkin”, deyiladi ob-havo xizmati xabarida.
Kaliforniyada o‘rmon yong‘inlari 7-yanvardan buyon davom etmoqda.
Falokat Los Anjeles hududlarini, jumladan, Pasifik-Paliseyds, Altadena va Malibu shaharlarini qamrab oldi. Keyinchalik yong‘in Iton, Xerst va boshqa hududlarga ham tarqaldi.
Yong‘inlar jami 40 ming akrdan ortiq (16 ming gektardan ortiq) maydonni qamrab olgan. CBS ma’lumotlariga ko‘ra, o‘rmon yong‘inlari tufayli 100 mingdan ortiq odam evakuatsiya qilingan. Kaliforniya gubernatori Gevin Nyusom bu yong‘inlar zarar ko‘lami bo‘yicha AQSH tarixidagi eng yomon tabiiy ofat bo‘lishini aytdi.
JPMorgan banki tahlilchilarining dastlabki hisob-kitoblariga tayanib, sug‘urta kompaniyalarining yong‘in tufayli yo‘qotishlari 20 milliard dollarga, umumiy zarar esa 50 milliard dollarga yetishi mumkin. Amerika politsiyasi Los Anjelesda yirik yong‘in uyushtirganlikda gumonlanayotgan shaxsni qo‘lga olgan. Gumonlanuvchiga qotillik bilan teng keladigan jazo va umrbod qamoq jazosi tayinlanishi mumkin.
Izoh (0)