O‘zbekiston va Malayziya aqlli qishloq xo‘jaligi texnologiyalari va dronlar ishlab chiqarishda amaliy hamkorlik qilishga kelishdi. Bu haqda Qishloq xo‘jaligi vazirligi matbuot xizmati xabar berdi.
Qayd etilishicha, hozirgi kunda O‘zbekiston va Malayziya o‘rtasida qishloq xo‘jaligi sohasida bir nechta yo‘nalishda hamkorlik yo‘lga qo‘yilmoqda. Shu maqsadda Qishloq xo‘jaligi vazirligi tizimi masʼullari, Toshkent va Qashqadaryo viloyatlari hamda tuman rahbarlari va klasterlardan iborat delegatsiya Malayziyada xizmat safari bilan bordi.
Tashrif davomida aqlli qishloq xo‘jaligi texnologiyalari va dronlar ishlab chiqarish, sholichilik, baliqchilik, kauchuk yetishtirish, meva-sabzavot va ipak mahsulotlarini eksport qilish kabi yo‘nalishlarda amaliy hamkorlik ishlarini boshlashga kelishib olindi.
Xususan, Meraque kompaniyasi bilan hamkorlikda Toshkent viloyatining Yangiyo‘l tumanidagi Qishloq xo‘jaligini mexanizatsiyalashtirish ilmiy-tadqiqot instituti hududida aqlli qishloq xo‘jaligi texnikalari va dronlarni mahalliylashtirgan holda ishlab chiqarish bo‘yicha kelishuv imzolandi.
Malayziya Qishloq xo‘jaligi va oziq-ovqat xavfsizligi vazirligining Baliqchilik departamenti hamda “O‘zbekbaliqsanoat” uyushmasi hamkorligida O‘zbekistonda Malayziyaning yangi texnologiyalari asosida intensiv baliqchilik, bioflok va krivetka yetishtirish loyihalari yo‘lga qo‘yiladi. Malayziya Qishloq xo‘jaligi marketing agentligi bilan hamkorlikni rivojlantirish orqali O‘zbekistonda yetishtirilgan meva-sabzavot va ipak mahsulotlarini eksport qilish yo‘lga qo‘yiladi.
Malayziya kompaniyalari O‘zbekistonda dronlar ishlab chiqarishga qiziqish bildirayotgani haqida 2023-yilning aprelida ma’lum qilingandi. 2024-sentyabrida Malayziyaning yetakchi robototexnika yetkazib beruvchisi Meraque Group kompaniyasi va O‘zbekiston Qishloq xo‘jaligi vazirligi o‘rtasida o‘zaro anglashuv memorandumi imzolangandi.
Ushbu kompaniya kelgusi uch yil ichida O‘zbekistonda mingta ish o‘rni yaratadigan va 100 ming gektar qishloq xo‘jaligiga xizmat ko‘rsatadigan ishlab chiqarish korxonasini tashkil etish uchun 20 million Malayziya ringgiti sarmoya kiritmoqchi. Kompaniya, shuningdek, mintaqadagi texnologik takomillashtirish uchun qo‘shimcha 30 million ringgit yig‘moqchi.
2018-yilda tashkil topgan Meraque kompaniyasi keng turdagi dronlar va ular uchun dasturiy taʼminot ishlab chiqarish, robototexnikaga ixtisoslashgan. Kompaniya Vyetnam, Kambodja, Filippin, Laos va Pokistonda faoliyat yuritadi.
Shavkat Mirziyoyevning uchuvchisiz parvoz qiluvchi zamonaviy qurilmalar — dronlar qishloq xo‘jaligida muhim ahamiyatga egaligini aytgandi.
“Agar sohaning ertangi kunini o‘ylasak, bunday zamonaviy tizimga tezroq o‘tishimiz kerak. Dronlar ishlab chiqarishni o‘zlashtirish, bu borada qo‘shma korxona tuzish va kadrlar tarbiyalash masalasiga alohida e’tibor qaratish lozim”, degan edi davlat rahbari.
O‘zbekistonda 2021-yilning noyabridan boshlab qishloq xo‘jaligida agrotexnik tadbirlar uchun mo‘ljallangan, maksimal uchish og‘irligi 100 kilogrammgacha (boshqa maqsadlarda 25 kilogrammdan ortiq bo‘lmagan) uchuvchisiz uchadigan apparatlardan foydalanishga ruxsat etilgan. Ularni olib kirish va foydalanish uchun ruxsat olishning ancha murakkab tartibi tufayli qishloq xo‘jaligida agrodronlardan foydalanish keng tarqalmagan.
Qishloq xo‘jaligida dronlardan foydalanish
Qishloq xo‘jaligi uchuvchisiz uchish qurilmalaridan foydalanishning eng samarali yo‘nalishlaridan biri hisoblanib (ekinlar holatini kuzatib borish, pestitsidlarni purkash, tuproq holatini, sug‘orish darajasini tahlil qilish, kasalliklarni aniqlash va h.k.) 2023-yilda jahon uchuvchisiz uchish qurilmalar bozorining 28 foizini tashkil qilgan. Fact.MR tahliliy agentligi ma’lumotlariga ko‘ra, 2033-yilga borib qishloq xo‘jaligi dronlari bozori 4 barobar kengayadi va 14 milliard dollarga yetadi.
Yaponiyada deyarli 5 million gektar ekin maydoni mavjud. Bugungi kunda ekin maydonlarining 20 foizdan ortig‘ida o‘simliklarni himoya qilish, zararkunandalar va begona o‘tlarga qarshi kurashda dronlardan foydalanilmoqda. Polsha Qishloq xo‘jaligi, oziq-ovqat va qishloq ishlari vazirligi maʼlumotlariga ko‘ra, dronlardan foydalanish tarmoq unumdorligini 5 foizgacha oshirishi va har yili iqtisodiy qiymatning 2,5 milliard yevroga qo‘shimcha oshishiga olib kelishi mumkin. Xitoyda 200 mingdan ortiq uchuvchisiz uchish qurilmalaridan 14,5 mln gektarga yaqin ekin maydonlarini ishlov berish uchun foydalaniladi.
Izoh (0)