O‘zbekiston Oliy taʼlim, fan va innovatsiyalar vazirligi, “‘Navoiy’ Maxsus iqtisodiy zona direksiyasi” vakillari va Malayziyaning uchuvchisiz boshqariladigan apparatlarni (dronlar) ishlab chiqarishga ixtisoslashgan bir qator yetakchi kompaniyalari o‘rtasida onlayn uchrashuvlar tashkil etildi. Bu haqda “Dunyo” agentligi xabar berdi.
Qayd etilishicha, mazkur tadbirlar chog‘ida O‘zbekistonda qishloq xo‘jaligi va sanoat sohalarida foydalanish uchun dronlar ishlab chiqarish tizimini yo‘lga qo‘yish bo‘yicha hamkorlik masalalari muhokama qilingan.
Shuningdek, Malayziya kompaniyalari tomonidan ishlab chiqariladigan dronlar to‘g‘risida maʼlumot taqdim etilgan. Xususan, xorij tomoni qishloq xo‘jaligi uchun mo‘ljallangan AGRI seriyalaridagi dasturiy taʼminot bilan integratsiyalashgan purkagich dronlari, Octocopter seriyali kuryer dronlari va UGV-Unmanned Ground Vehicle kabi dronlarning texnik ko‘rsatkichlari bo‘yicha taqdimot o‘tkazgan.
Ushbu mamlakatning Alphaswift, Meraque va Aonis kompaniyalari O‘zbekistonda dronlar ishlab chiqarish loyihasini amalga oshirish istiqbollarini o‘rganib chiqishga qiziqish bildirgan.
Alphaswift kompaniyasining asosiy faoliyat turi qishloq xo‘jaligi va yetkazib beruvchi dronlarni ishlab chiqarish, ularni modifikatsiyalashga ixtisoslashgan.
2018-yilda tashkil topgan Meraque kompaniyasi keng turdagi dronlar va ular uchun dasturiy taʼminot ishlab chiqarish, robototexnikaga ixtisoslashgan. Kompaniya Vyetnam, Kambodja, Filippin, Laos va Pokistonda faoliyat yuritadi. Mazkur kompaniya Malayziyada 2022-yilning eng innovatsion texnologiyasi tanlovida 2-o‘rinni qo‘lga kiritgan.
Aonis kompaniyasi esa Xitoyning jahondagi eng yirik dron ishlab chiqaruvchi DJI kompaniyasining Janubi-Sharqiy Osiyodagi rasmiy distribyutori hisoblanadi. Aonis tomonidan qishloq xo‘jaligi va sanoat soxasida keng turdagi dron xizmatlari ko‘rsatiladi.
Uchrashuvlar natijasida hamkorlikda O‘zbekistonda dronlar ishlab chiqarish investitsiya loyihasini amalga oshirishning huquqiy asos va imkoniyatlarini o‘rganish, loyihalarning texnik parametrlarini ishlab chiqish bo‘yicha kelishuvga erishilgan.
2017-yil iyulda Shavkat Mirziyoyev Toshkent viloyatidagi qishloq xo‘jaligi yer maydonlarini monitoringdan o‘tkazish ishlarining taqdimoti bilan tanishgandi. O‘shanda prezidentga qishloq xo‘jaligida dron An-2 samolyotidan afzal ekani ko‘rsatib berilgan. Shundan keyin davlat rahbari uchuvchisiz parvoz qiluvchi zamonaviy qurilmalar — dronlar qishloq xo‘jaligida muhim ahamiyatga ega ekanini aytib, ularni ishlab chiqarishni o‘zlashtirishga e’tibor qaratish lozimligini ta’kidlagan edi.
“O‘zbekiston Respublikasida uchuvchisiz uchadigan apparatlardan foydalanishni tartibga solish bo‘yicha qo‘shimcha chora-tadbirlar to‘g‘risida”gi Vazirlar Mahkamasi qaroriga ko‘ra, respublika hududida uchuvchisiz uchadigan apparatlar, ularning butlovchi va ehtiyot qismlarining belgilangan tartibda majburiy deklaratsiya qilinadigan tranzitidan tashqari qonunga xilof ravishda olib kirish, sotish, sotib olish, saqlash yoki ulardan foydalanish taqiqlanadi.
Izoh (0)