Ufuk Ulutash Turkiyaning O‘zbekistondagi yangi elchisi bo‘ldi. Bu haqda TIV matbuot xizmati xabar berdi.
27-fevral kuni O‘zbekiston tashqi ishlar vaziri Baxtiyor Saidov undan ishonch yorliq nusxalarini qabul qildi va ushbu lavozimga tayinlangani bilan tabriklab, diplomatik missiyasida muvaffaqiyat tiladi.
“Nafaqat ikki tomonlama sheriklik darajasida, balki mintaqaviy hamkorlikni kengaytirishda ham faol davom etmoqda. Ishonchimiz komilki, birgalikdagi sa’y-harakatlarimiz har ikki mamlakat ravnaqi va taraqqiyotiga xizmat qiladi” deb yozdi Baxtiyor Saidov o‘zining sahifasida.
Turkiyaning O‘zbekistondagi elchisi lavozimida 2021-yil mart oyidan beri Olgan Bekar ishlab kelayotgan edi. 2025-yil 8-fevral kuni Baxtiyor Saidov diplomatik missiyasini yakunlayotgan Olgan Bekar bilan uchrashib, O‘zbekiston va Turkiya qardoshlik munosabatlarini mustahkamlashga katta hissa qo‘shgani uchun minnatdorlik bildirib, kelgusi faoliyatida muvaffaqiyatlar tilagandi.
2025-yil 31-yanvarda Baxtiyor Ibragimov O‘zbekistonning Albaniyadagi birinchi elchisi etib tayinlangani haqida xabar berilgan edi. Ravshan Usmonov esa O‘zbekistonning Islandiyadagi (qarorgohi London shahrida joylashgan) elchisi etib tayinlandi va 7-fevral kuni Islandiya prezidenti Xalla Tomasdottirga ishonch yorliqlarini topshirdi. 11-fevral kuni O‘zbekiston elchisi Temur Rahmonov Litva prezidenti Gitanas Nausedaga ishonch yorliqlarini topshirdi.
Izoh (0)