Hindistonning mashhur komik aktyori Kunal Kamra Maxarashtra shtati bosh vaziri o‘rinbosariga shama qilgani uchun tergov qilinmoqda. Stendap ijrochisiga nisbatan tuhmat bo‘yicha ish ochilgan. Bu haqda CNN xabar bermoqda.
Kunal Kamra pop-madaniyat va siyosat haqidagi hajviy chiqishlari bilan tanilgan. Uning 23-mart kuni Mumbayda bo‘lib o‘tgan tomoshasi ham mahalliy siyosatchilar va oligarxlarga, xususan, milliarder Mukesh Ambani o‘g‘li Anant hamda yirik farmatsevtika kompaniyasi egasining qizi Radxika Merchant o‘rtasidagi hashamatli to‘yga bag‘ishlangan edi.
Chiqish davomida Kamra Maxarashtra shtati bosh vaziri o‘rinbosari Eknatxa Shinde haqida hazil qilgan. Bunda u amaldorning ismini aytmagan, faqat unga ishora qilgan.
Komediyachi chiqishidan so‘ng amaldor mansub bo‘lgan “Shiv Sena” radikal hind partiyasi tarafdorlari klubga kelgan va uni vayron qilishgan.
“Shiv Sena” vakilining aytishicha, Kunal Kamra o‘z chiqishi bilan Maxarashtra aholisini “haqorat qilgan”.
“Mumbay politsiyasi Kunal Kamrani hibsga olishi, qamoqqa tiqishi va unga qarshi ish qo‘zg‘atishi kerak”, dedi partiya vakili o‘z videomurojaatida.
Kamraning o‘zi esa hazillar uchun uzr so‘ramoqchi emasligini, shuningdek, “Shiv Sena” tarafdorlaridan qo‘rqmasligini aytgan. YouTube’ga joylashtirilgan komikning chiqishi videosi ostida yuzlab odamlar san’atkorni qo‘llab-quvvatlab, izoh qoldirgan va unga hukumat bilan bo‘lajak sud jarayoni uchun pul xayriya qilgan.
Izoh (0)