Bollivud yulduzlaridan badavlat merosxo‘rlargacha: Hindistonda o‘tkazilgan eng qimmatbaho va dabdabali to‘ylar top-10 taligi

Anant Ambani va Radxika Merchantning to‘yidagi hashamat ko‘pchilikni lol qoldirdi. Hindistonda bunday to‘ylar odatiy hol bo‘lsa-da, bu to‘y haqiqatdan ham ajoyib bo‘ldi. Siz uchun so‘nggi yillardagi eng hashamatli to‘y marosimlarining top-10 tasini to‘pladik.

Anant Ambani va Radxika Merchant: 300 dan 600 million dollargacha

Bu to‘yning hashamatini yaqin vaqt ichida hech kim o‘rnini bosa olmasligi aniq. Anant Ambani va Radxika Merchantning to‘yini butun dunyo bir necha oy davomida qiziqarli serialdek kuzatib bordi. Bahorda oshiqlar bir necha kun to‘y oldi marosimlarini o‘tkazdilar (hatto Rianna bir necha yildan keyin birinchi marta sahnaga chiqdi!), iyulda esa to‘y marosimi o‘tkazildi va u uch kun davom etdi. Rasmiy xarajatlar oshkor etilmagan, ammo turli mutaxassislar o‘z fikrlarini bildirishdi.

Eng kam taxminlarga ko‘ra, kamida 150 million dollar sarflangan, ammo ovqat, xavfsizlik, yulduzli mehmonlar uchun transport va yashash joylari, shuningdek, yulduzlar uchun gonorarlarni (Rianna 7 million dollar, Jastin Biber esa 10 million dollar olgan degan gaplar bor) hisobga olsak, ko‘pchilik 300 million dollargacha xarajat qilingan deb hisoblaydi. Shundan keyin ham kenja farzandlarni ko‘proq erkalatishadi degan fikrga qarshimisiz?

Isha Ambani va Anand Piramal: taxminan 100 million dollar

Anantning katta opasi va milliarder Mukesh Ambanining yagona qizi Isha Ambani 2018-yilda Anand Piramalga turmushga chiqdi. To‘y marosimi bir haftaga yaqin davom etdi va dunyoning turli burchaklarida o‘tkazildi. Marosimlar Udaypurda, Italiyaning Komo ko‘lida va Mumbayda jahon yulduzlari ishtirokida o‘tkazildi, to‘y marosimi esa Hindistondagi Pichola ko‘lidagi xususiy orolda bo‘lib o‘tdi.

Sushanto va Simanto Royevning qo'shaloq to'yi: taxminan 75 million dollar

2004-yilda biznes magnat Subrata Roy o‘z o‘g‘illarini bir vaqtda uylantirdi. Hashamatli tadbir Lakxnaudagi “Saxara” stadionida bo‘lib o‘tdi va bir hafta davom etdi. Unda 11 000 dan ortiq mehmon, jumladan, Bollivud yulduzlari va sportchilar ishtirok etdi. Dunyoning turli burchaklaridan mehmonlar xususiy samolyotlarda keldi.

Braxmani va Radjiv Reddi: 74 million dollar

2011-yilda noqonuniy kon qazish faoliyati uchun hibsga olingan sobiq kon magnati va siyosatchi Janardxan Reddi 2016-yilda o‘z qizi Braxmanining to‘yida hashamatli tarzda nishonladi. Besh kunlik tadbir Bangalor saroyida (aynan Vindzor qasrining kichik nusxasi) bo‘lib o‘tdi va unda 50 000 dan ortiq mehmon ishtirok etdi.

Shristi Mittal va Gulradj Bel: taxminan 70 million dollar

Po‘lat magnati Pramod Mittalning qizi Shristi 2013-yilda Barselonadagi uch kunlik hashamatli to‘y qilib investitsiya bankiri Gulradj Belga turmushga chiqdi. To‘yda 500 mehmon ishtirok etdi, menyuni mashhur ispan oshpazi Serji Arola tuzdi, tadbirning gastronomik kulminatsiyasi esa 60 kg vaznli olti qavatli to‘y torti bo‘ldi.

Asosiy to‘y marosimi Kataloniya sanʼati milliy muzeyida bo‘lib o‘tdi, kelin-kuyovning ota-onalari fotograflar va video operatorlarning tadbirni har tomondan suratga olishlari uchun vertolyotlar ham ijaraga oldilar.

Vanisha Mittal va Amit Bxatiya: taxminan 66 million dollar

Yevropada o‘z to‘yini Pramod Mittalning jiyani Vanisha ham nishonladi. U uning akasi va po‘lat magnati Lakshmi Mittalning qizi. 2004-yilda u London bankiri Amit Bxatiaga turmushga chiqdi. Parijda bo‘lib o‘tgan olti kunlik tadbirda Kayli Minoug va Bollivud yulduzlari, jumladan, Shohruhxon va Ayshvariya Ray ishtirok etdi. Mashhur hind shoiri Javed Axtar to‘y oldi marosimlari uchun ssenariy yozgan. Asosiy to‘y marosimi XVII asrdagi Vo-le-Vikont qasrida bo‘lib o‘tdi, uning bog‘ida Mumbaydan 35 dan ortiq ustalar jamoatchilik uchun marosimlar o‘tkazishga mo‘ljallangan anʼanaviy pavilyon — mandapa qurgan.

Sonam Vasvani va Navin Fabiani: taxminan 30 million dollar

2017-yilda Stallion Group konsernining asoschisi Sunil Vasvanining qizi Sonam Vasvani Fors ko‘rfazi mintaqasidagi eng boy hindlik Kamal Fabianining o‘g‘li biznesmen Navin Fabiani bilan turmush qurdi. Bayram Vena shahrida bo‘lib o‘tdi. To‘yning asosiy kunidan oldin “Ferstel” saroyida to‘y oldidan ziyofat bo‘lib o‘tdi, keyin mehmonlar va kelin-kuyov Belveder saroyiga ko‘chib o‘tishdi. Bruno Mars yosh juftlik va ularning mehmonlari oldida chiqish qildi.

Virat Kohli va Anushka Sharma: taxminan 15 million dollar

Hindiston kriket terma jamoasining sobiq sardori Virat Kohli va Bollivud aktrisasi Anushka Sharma 2017-yil dekabr oyida Italiyaning Komo ko‘lida turmush qurishdi. U yerda nisbatan kam sonli mehmonlar ishtirokida hind to‘y marosimlariga monand to‘y bo‘lib o‘tdi. Bir necha kundan keyin Mumbayda hashamatli to‘y qabuli bo‘lib o‘tdi, unda mashhurlar va kriket o‘yinchilari ishtirok etdi, keyin to‘y Dehli shahriga ko‘chib o‘tdi — bu erda mamlakat bosh vaziri Narendra Modi ham to‘yga tashrif buyurdi.

Adel Sajjan va Sana Khan: taxminan 15 million dollar

Biznesmen Adel Sajjan 2017-yil aprel oyida aktrisa Sana Khan bilan hashamatli kruiz uslubidagi to‘y tashkillashtirdi. Juftlik Barselonadan Italiyaga Fransiya orqali yo‘l olgan Costa Fascinosa kruiz kemasida nikoh qasamyodini qilishdi. Ko‘p kunlik bayram davomida mehmonlarga Harrodsdan shaxsiylashtirilgan sovg‘alar to‘plami taqdim etildi va bayram 10 qavatli to‘y tortini kesish bilan yakunlandi.

Ranvir Singh va Dipika Padukone: taxminan 11,5 million dollar

Albatta, biznes imperiyalari merosxo‘rlarining to‘ylariga kino yulduzlari to‘ylari teng kela olmaydi, lekin ularning to‘yi ham o‘z ko‘lami bilan baribir hayratga soladi. 2018-yilda olti yillik tanishuvdan so‘ng Bollivud juftligi Ranvir Singh va Dipika Padukone Italiyaning Komo ko‘lida turmush qurishdi. Ular birinchi to‘y marosimini Konkani xalqining anʼanalariga ko‘ra Villa dʼEsteda, ikkinchisini esa Sindh anʼanalariga ko‘ra Villa Roccabruna mehmonxonasida o‘tkazdilar. Keyin yangi turmush qurganlar Hindistonga qaytib, kelinning tug‘ilgan joyi — Bangalor va Mumbayda to‘y marosimlari bilan bilan bayramni davom ettirdilar.