Ҳиндистоннинг машҳур комик актёри Кунал Камра Maxarаштра штати бош вазири ўринбосарига шама қилгани учун тергов қилинмоқда. Стендап ижрочисига нисбатан туҳмат бўйича иш очилган. Бу ҳақда CNN хабар бермоқда.
Кунал Камра поп-маданият ва сиёсат ҳақидаги ҳажвий чиқишлари билан танилган. Унинг 23 март куни Мумбайда бўлиб ўтган томошаси ҳам маҳаллий сиёсатчилар ва олигархларга, хусусан, миллиардер Мукеш Амбани ўғли Анант ҳамда йирик фармацевтика компанияси эгасининг қизи Радхика Мерчант ўртасидаги ҳашаматли тўйга бағишланган эди.
Чиқиш давомида Камра Maxarаштра штати бош вазири ўринбосари Экнатха Шинде ҳақида ҳазил қилган. Бунда у амалдорнинг исмини айтмаган, фақат унга ишора қилган.
Комедиячи чиқишидан сўнг амалдор мансуб бўлган “Шив Сена” радикал ҳинд партияси тарафдорлари клубга келган ва уни вайрон қилишган.
“Шив Сена” вакилининг айтишича, Кунал Камра ўз чиқиши билан Maxarаштра аҳолисини “ҳақорат қилган”.
“Мумбай полицияси Кунал Камрани ҳибсга олиши, қамоққа тиқиши ва унга қарши иш қўзғатиши керак”, деди партия вакили ўз видеомурожаатида.
Камранинг ўзи эса ҳазиллар учун узр сўрамоқчи эмаслигини, шунингдек, “Шив Сена” тарафдорларидан қўрқмаслигини айтган. YouTube’га жойлаштирилган комикнинг чиқиши видеоси остида юзлаб одамлар санъаткорни қўллаб-қувватлаб, изоҳ қолдирган ва унга ҳукумат билан бўлажак суд жараёни учун пул хайрия қилган.
Изоҳ (0)