Kino yulduzlarning farzandlari ota kasbini tanlashi bejiz emas — ular bolaligidan san’at olamiga yaqin sharoitda ulg‘ayadi va ijodiy muhit ularga kino sohasini tanlashiga turtki bo‘ladi. Ushbu maqolada afsonaviy Bollivud yulduzlarining kasbini tanlagan mashhur farzandlar haqida batafsil ma’lumot beramiz.
Shohruhxonning o‘g‘li Aryan Xon
Bollivud qiroli Shohrux Xon va prodyuser Gauri Xonning to‘ng‘ich farzandi Aryan Xon 1997-yilning 13-noyabr sanasida dunyoga kelgan. Aryan 14 yoshga to‘lganda, Shohrux va Gauri uni paparatsilardan yashirish uchun Londondagi kichik xususiy maktabga yuborgan. Los Anjelesdagi kino maktabining rejissyorlik bo‘limini tugatgan bola filmlarda rol o‘ynashni xohlamasligini aytgan.
Aryan bolaligidan sportga qiziqqan va taekvondo bo‘yicha qora belbog‘ga ega bo‘lgan. 2010-yilda esa Maxarashtra shtatidagi musobaqalarda oltin medalni qo‘lga kiritgan. Shohrux Xonning to‘ng‘ich o‘g‘li 2021-yilda Mumbaydagi Cordelia Cruises kemasida o‘tkazilgan reyddan so‘ng Narkotik moddalarni nazorat qilish byurosi tomonidan hibsga olingan. Keyinchalik ozodlikka chiqarilgan Aryan Xon kinodagi faoliyatini rejissyor sifatida boshlashga qaror qilgan. Shunday qilib, Aryan Xon ssenariy yozish va rejissyorlik faoliyatini “Stardom” nomli serial bilan boshladi.
Aryan Xon 2019-yilda “Qirol sher” animatsion filmining hindcha dublyajida Simbaga ovoz bergan. Uning otasi Shohrux Xon esa Mufasa roliga ovoz bergan. Bu loyiha Aryanning ovoz aktyor sifatidagi debyuti bo‘lgan.
Aryan Xon shaxsiy hayotini ommadan yiroq tutishga harakat qiladi va ijtimoiy tarmoqlarda kamnamo bo‘ladi. Shunga qaramay, u Bollivuddagi faoliyati bilan ota-onasining izidan borishga intilmoqda.
Shohruhxonning qizi Suhana Xon
Suhana 2000-yilning 22-may sanasida tug‘ilgan. Qizaloq ko‘p qirrali shaxs sifatida voyaga yetdi. U raqs va sportni yaxshi ko‘rardi, hikoyalar yozardi va otasi bilan tez-tez kriket musobaqalarida qatnashardi. U maktab yillarida taekvondo bilan shug‘ullangan, futbol jamoasi sardori bo‘lgan, turnirlarda g‘olib chiqqan. Bo‘lajak aktrisa nufuzli Dhirubhaya Ambani maktabida o‘qigan, keyinchalik Angliyadagi boy insonlarning farzandi tahsil oladigan maktab-internatga o‘qishga kirgan.
2018-yilda Suhana Vogue India jurnalining avgust soni muqovasida chiqqanidan so‘ng Bollivuddagi qarindosh-urug‘chilik haqidagi qizg‘in muhokamalarga sabab bo‘ldi. Jurnalda hali kino olamida debyut qilmagan 18 yoshli qiz “talaba, teatr ishqibozi va bo‘lajak yulduz” deb ta’riflangan.
U kollejda tahsil olganidan so‘ng Nyu York san’at universitetida o‘qidi. U yerda aktyorlik va sahna aktyorligi bo‘yicha ta’lim oldi. Suhana 19 yoshida 10 daqiqalik “Ko‘kning kulrang qismi” qisqa metrajli filmida aktrisa sifatida debyut qildi. Bu loyiha o‘zaro munosabatlardagi muammolarni hal qilish uchun sayohatga chiqqan yosh juftlik haqida hikoya qilardi. Film YouTube’da 2 milliondan ortiq tomosha qilindi va yosh aktrisaning faoliyati birorta salbiy izohga sabab bo‘lmadi.
Aslida, Suhanadan bunday yuqori saviyadagi ijroni hech kim kutmagandi. Tomoshabinlar Shohrux Xonning qizini tasvirlashga so‘z topa olmadi. Ular qizning tashqi ko‘rinishi otasiga o‘xshashini, uning mahorati va iste’dodi eng yuqori darajada ekanini ta’kidladi. Shohrux Xon qizining Bollivudda muvaffaqiyatga erishishida hech qanday yordam bermadi.
Suhana 2022-yilning dekabr oyida rejissyor Zoya Axtar tomonidan suratga olingan “Archi” filmida suratga tushdi. Bu loyiha mashhur “Riverdeyl” serialining hind tilidagi moslashuvi. Serialning premyerasi Netflix’da bo‘lib o‘tdi.
Joriy yilda Aryan Xon o‘zining rejissyorlik debyutini nishonlaydigan yangi Netflix seriali — “Bollivudning sho‘x yigitlari” premyerasi bo‘lib o‘tadi. Serial Hindiston kino industriyasi haqida bo‘lib, unda hind kinosiga yangi kelgan yoshlar Bollivoodning murakkab va oldindan aytib bo‘lmaydigan dunyosida o‘z o‘rnini topishga harakat qiladi. Serial ilk bor 2025-yil iyun oyining birinchi haftasida namoyish etilishi rejalashtirilgan. Unda Shohruh Xon va uning o‘g‘li Aryan Xon bosh rollarni gavdalantiradi.
Shridevining qizlari Janvi Kapur va Khushi Kapur
Hind kinosining afsonaviy aktrisasi ikki nafar qizi: Janvi va Khushi Kapurni voyaga yetkazgan. 1997-yilda tug‘ilgan Janvi Kapur hozirda mashhurlik maqomi sari olg‘a qadam tashlamoqda. U 2018-yilda “Yurak urishi” debyut filmi bilan aktrisalik orzularini ro‘yobga chiqardi. Afsuski, Shrideviga katta ekranda qizining debyutini ko‘rish nasib etmadi.
Janvining sanoatdagi debyuti 2013-yilda, u 16 yoshda bo‘lganida bo‘ldi. Uni oilaviy do‘sti Karan Johar “2-kurs talabasi” filmiga taklif qilishi kerak edi. Biroq loyiha to‘xtatildi va “Yurak urishi” uning ilk loyihasiga aylandi. Mazkur loyihadagi roli uchun u “Eng yaxshi debyutant” nominatsiyasi bo‘yicha Zee Cine Award mukofotini qo‘lga kiritdi.
Khushi 2000-yilda tug‘ilgan, hozirda kino sohasida o‘z o‘rnini topishga intilmoqda. U Suhana bilan birga “Archi” nomli Netflix filmida debyut qildi. Mazkur filmda Khushi o‘zining aktyorlik mahoratini namoyish etib, tomoshabinlarning e’tiborini qozondi.
Amitabh Bachchanning nabirasi Agastya Nanda
Bollivudning afsonaviy aktyorlaridan biri Amitabh Bachchan va Raj Kapurning nabirasi Agastya Nanda 2000-yil 23-noyabrda Hindistonning Mumbay shahrida tug‘ilgan. Onasi Shveta Bachchan Nanda yozuvchi va jurnalist, otasi Nikhil Nanda esa Hindistonning yirik kompaniyalaridan biri bo‘lgan Escorts Groupning bosh direktori. Agastyaning opasi Navya Naveli Nanda biznes sohasida faoliyat yuritadi.
Agastya Nanda Londonda joylashgan nufuzli Sevenoaks maktabida tahsil olgan. Ushbu maktab Britaniyadagi eng yaxshi o‘quv yurtlaridan biri bo‘lib, u yerda shahzoda Uilyam va boshqa taniqli insonlarning farzandlari o‘qigan.
Agastya 2023-yilda hind kinosiga kirib kelgan. Uning debyut filmi “Archi” loyihasi bo‘lib, unda yosh ijodkor Archi Endryus rolini ijro etgan.
Joriy yil ikkinchi choragida u yana bir katta loyiha — “Ikkisi” filmida suratga tushishi kutilmoqda. Bu film 1971-yilgi urush davrida Param Vir Chakra mukofotiga sazovor bo‘lgan leytenant Arun Khetrapalning hayoti haqida hikoya qiladi va rejissyor Sriram Raghavan tomonidan suratga olinadi.
Sanni Deolning o‘g‘li Rajvir Deol
Sanni Deolning kenja o‘g‘li va Dharmendraning nabirasi Rajvir Deol 1994-yil 12-mayda Mumbay shahrida tug‘ilgan. Onasi Puja Deol, akasi Karan Deol ham aktyorlik faoliyati bilan shug‘ullanadi. Rajvir Mumbaydagi Ecole Mondiale World maktabida tahsil olgan.
Uning kino olamidagi debyuti 2023-yilda “Ikkovlon” filmida bo‘lib o‘tgan. Unda Rajvir Paloma Dhillon bilan birgalikda suratga tushgan. Film rejissyori Avnish Barjatya bo‘lib, loyiha Rajshri Productions tomonidan ishlab chiqarilgan. Rajvirning ijrosi esa tomoshabinlar va tanqidchilar tomonidan ijobiy baholangan.
Mithun Chakrabortining o‘g‘li Namashi Chakraborti
Namashi Chakraborti 1992-yil 4-sentyabrda Mumbay shahrida tug‘ilgan. U o‘zining aktyorlik faoliyatini boshlashdan oldin Shiamak Davar maktabida raqs san’atini o‘rgangan va Mumbaydagi Kishor Namit Kapur aktyorlik institutida tahsil olgan.
U 2013-yilda “Qahramon” nomli qisqa metrajli filmini suratga oldi, so‘ng akasi Mimohning “Sevgi daryosi” filmida rejissyor yordamchisi bo‘lib ishladi. So‘ng Namashi o‘zining birinchi “Yomon yigit” nomli filmini ola boshladi.
Film 2020-yilda ekranlarga chiqishi kerak edi, biroq pandemiya tufayli loyihaning premyerasi kechiktirildi. 2021-yilning kuzida suratga olish guruhi film syomkasi uchun Sankt-Peterburgga jo‘nab ketdi va Mithun Chakraborti ham o‘g‘lini qo‘llab-quvvatlash uchun birgalikda uchdi.
Shunday qilib, “Yomon yigit” filmi 2023-yil 28-aprelda namoyish etildi. Filmda Namashi o‘zining birinchi aktyorlik ishi bilan tomoshabinlar eʼtiborini qozona oldi.
Saif Ali Xonning qizi Sara Ali Xon
Sara — aktyor Saif Ali Xon va aktrisa Amrita Singhning qizi. U 1995-yilning 12-avgustida tug‘ilgan. Aktrisa qirollar naslidan, chunki uning otasi tomonidan bobosi Mansur Ali Xon sobiq Bhopal mulkining merosxo‘ri, navab va birinchi darajali kriketchi edi. Uning buvisi Sharmila Tagor ham sobiq aktrisa va Rabindranat Tagorning hurmatga sazovor sulolasidan bo‘lgan.
Sara Ali Xon taniqli oilaning vakili sifatida, mukammal ta’lim oldi. U Kolumbiya universitetining tarix va siyosatshunoslik fakultetini tamomladi. 2018-yilda u ota-onasining izidan borishga qaror qildi va “Kadernath” filmida debyut qildi. Ushbu melodramadan keyin aktrisa katta muvaffaqiyatga erishdi. Film haqida juda xilma-xil sharhlar bo‘lsa-da, hamma istisnosiz Sara Ali Xonning chiqishi haqida ishtiyoq bilan gapirdi.
Aktrisa debyuti uchun “Eng yaxshi aktrisa” sifatida nufuzli Xalqaro Hindiston kino akademiyasi va Filmfare mukofotlari bilan taqdirlandi. Keyinchalik u “Simba” jangovar komediyasida suratga tushdi.
Keyin esa Imtiaz Alining “Muhabbat kecha va bugun-2” romantik dramasida (2020-yilda suratga olingan) va “Porter #1” komediyasida rol o‘ynadi. Ikkala filmda ham uning ijrosi to‘liq tanqid qilingan, biroq uning ortidan suratga olingan “G‘alati sevgi” fantastik romantik komediyasi uning obro‘sini yana oshirgan.
Saif Ali Xonning o‘g‘li Ibrohim Ali Xon
Ibrohim Ali Xon aktyor Saif Ali Xon va uning birinchi rafiqasi Amrita Singxning farzandi. Ibrohim 18 yoshga to‘lishi bilanoq kino doiralarida rejissyor va prodyuser Karan Johar bilan o‘zining ilk filmini tayyorlayotgani haqida gap-so‘zlar tarqaldi. 2008-yilda otasining “Uslub” nomli filmida debyut rol ijro qilgan Ibrohim yaqinda bergan intervyulardan birida mashhur aktyor bo‘lishni istashini ta’kidlagan.
Fotosessiyalar, gazeta-jurnallardagi maqolalar va muqovalar, shaxsiy hayotga bo‘lgan g‘ayrioddiy qiziqish, ijtimoiy tarmoqlardagi ko‘plab muxlislar — bularning barchasi Ibrohimni tug‘ilganidan beri o‘rab olgan edi.
Ibrohim “Zamin” trillerida Karan Johar bilan birga ishtirok etdi. Film Kashmirdagi terrorizm voqealari haqida hikoya qiladi. Loyihani suratga olish guruhi Ibrohim haqida: “U juda mehribon. Boshqa ba’zi yangi kelganlardan farqli o‘laroq, Ibrohim mashhur aktyorning farzandi ekanligi bilan maqtanmaydi. Ibrohim o‘z ishini yaxshi biladi. U hammaga Saif Ali Xonni eslatadi. U suratga olish maydonchasiga kelganida 20 yil avvalgi Saif sahnaga chiqqandek bo‘ladi. U yosh va otasiga juda o‘xshaydi”, deya fikr bildirishgan.
Izoh (0)