Turkiya huquq-tartibot organlari tomonidan ijtimoiy tarmoqlarda “jinoyatchilik va nafratni qo‘zg‘atuvchi” yolg‘on ma’lumotlarni tarqatishda gumonlangan 37 kishi qo‘lga olindi. Bu haqda payshanba kuni Turkiya ichki ishlar vaziri Ali Yerlikaya ma’lum qilgan.
Uning aytishicha, huquq-tartibot idoralari Istanbul meri — muxolifatchi Ekrem Imomo‘g‘li hibsga olinganidan keyin, ijtimoiy tarmoqlarda tahqirlovchi mazmundagi 261 ta akkauntni aniqlagan, ularning 62 tasi “xorijda joylashgan”.
“37 kishi hibsga olindi, qolgan provokatsiyaga aloqadorlar qidirilmoqda. Akkauntlarning 66 foizi shaxsiy, 34 foizi botlar”, deydi Yerlikaya.
Kuni kecha Imomo‘g‘li korrupsiyaga qarshi tergov doirasida hibsga olingan edi.
Prokuratura “Imomo‘g‘li va bir necha tadbirkorlar bilan bog‘liq noqonuniy moliyalashtirish holatlari” aniqlangani haqida ma’lum qildi. “Dalillar noqonuniy daromad, pul yuvish va pul o‘tkazishning yashirin kanallariga ishora qilmoqda”, dedi Turkiya prokuraturasi vakili CNN Turk telekanali efirida.
Izoh (0)