Польша ҳукумати Беларусь ва Россия билан чегарадаги Шарқий қалқон мудофаа истеҳкомлари чизиғида пиёдаларга қарши миналар ўрнатишни режалаштирмоқда. Бу ҳақда Польша мудофаа вазири ўринбосари Павел Байдага таяниб, “ТАСС” хабар берди.
Бу пиёдаларга қарши миналар “Шарқий қалқон” элементларидан бири бўлади, деди Байда.
Унинг сўзларига кўра, Польшага бир миллионгача пиёда аскарларга қарши миналар керак, уларни мамлакат ичида ишлаб чиқариш режалаштирилган.
Буни Польша қурол-яроғ гуруҳи заводлари амалга оширади, аммо тафсилотларга тўхталиб ўтирмоқчи эмасман, деди сиёсатчи.
18 март куни Польша, Литва, Латвия ва Эстония мудофаа идоралари раҳбарлари ўз ҳукуматларига пиёдаларга қарши миналарни тақиқлаш бўйича Оттава конференциясидан чиқишни тавсия қилгани тўғрисида қўшма баёнот берди. Улар бундай қарорга минтақада хавфсизлик соҳасидаги вазиятнинг ёмонлашгани сабаб бўлганини айтган.
Пиёдаларга қарши миналарни тақиқлаш тўғрисидаги Оттава конвенцияси 1999 йилда кучга кирди, унга 164 давлат, шу жумладан, Украина қўшилган. Халқаро Қизил Хоч қўмитаси маълумотларига кўра, ушбу турдаги қуроллар тинч аҳоли орасида кўплаб қурбонларга олиб келади ва ҳарбий ҳаракатлар тугаганидан кейин ҳам узоқ йиллар давомида хавф туғдиришда давом этади.
Изоҳ (0)