Mutaxassislar Polshaning Internet resurslari ko‘pincha xakerlar nishoniga aylanishiga qaramay, ushbu mamlakatning kiberxavfsizlik darajasini yuqori baholadi. Bu haqda Euronews xabar berdi.
Xabarga ko‘ra, Polsha Milliy kiberxavfsizlik indeksida birinchi o‘rinni egallagan. Dunyoning turli mamlakatlarida axborot texnologiyalari xavfsizligi va kibertahdidlarning oldini olish darajasi baholangan tadqiqot davomida mazkur davlat ko‘pincha DDoS hujumlariga duchor bo‘lishi ham ma’lum bo‘lgan.
DDoS hujumchilari kompyuter tizimlari yoki tarmoq xizmatlarini nishonga oladi.
Bizning tahlillarimizdan, ittifoqchilarimiz hamda hamkorlarimizdan olgan ma’lumotlarimiz shuni ko‘rsatadiki, Polsha kiberhujumlarning bir turi — DDoS hujumlari bo‘yicha dunyodagi eng ko‘p xakerlik hujumiga uchragan mamlakatlardan biri. Vaqti-vaqti bilan hatto ro‘yxatda birinchi o‘rinda turadi, — deydi Polsha kibermudofaa kuchlari vakili Pshemyslav Lipchinski.
Mustaqil ekspertlarning ta’kidlashicha, Polsha resurslariga hujumlarning aksariyati Rossiyadan keladi va ular Ukrainadagi urush va Polsha logistikasi, shu jumladan, transport infratuzilmasi bilan bog‘liq.
Kibermakonni himoya qilish masalasi nafaqat Polsha uchun, balki xakerlik hujumlari soni tez sur’atlarda o‘sib borayotgan butun Yevropa uchun ham dolzarbdir.
IT xavfsizligi bo‘yicha tahlilchi Feliks Aim Yevropa kiberhujumdan juda yaxshi himoyalanganligini aytib, a’zo davlatlar o‘rtasida ma’lumot almashishni ta’minlaydigan hamda kiberxavfsizlik uchun yagona qonunchilik bazasi mavjudligini qo‘shimcha qilgan.
Izoh (0)