Зарафшон, Оқдарё, Қорадарёдан норуда қазилмаларини қазиб олишни ишчи гуруҳ ўрганмоқда. Бу ҳақда Самарқанд вилояти ҳокими вазифасини бажарувчи Адиз Бобоев ҳокимлик аппарати йиғилишида маълум қилди.
Адиз Бобоевнинг айтишича, дарёлардан норуда қазилмаларни қазиб олиш тартибсиз бўлиб кетгани учун ҳолатни ўрганиш бўйича топшириқ берилган.
Нима бўлди бу дарёни тақдири? Тамом бўлиб бўлган, ҳеч нарсаси қолмаган бу дарёни. Ҳамма жойини абгор қилиб ташлашган. Буни қандай тартибга келтирамиз, ўйлаб ўйимга етолмаяпман. Бир хил жойларда эни юзлаб метрга чўзилиб кетган. Ҳамма ёғини абгор қилиб ташлашган, ҳамма ўзбошимча, деди вилоят ҳокими.
Унинг алоҳида таъкидлашича, келажак авлод мазкур ҳолат бўйича саволларни ўртага ташлайди ва бунга сабабчи бўлган раҳбарлардан норози бўлади.
Келажак авлод — невараларимиз нима дейди? Ота-боболаримиз мана шунақанги — “совға” қилиб кетган деб айтишади-ку. Нима деб жавоб берамиз? Ўша пайтда ишлаган раҳбарларимиз бунга қарамаган, ўғрига шерик бўлиб юрган, деган нарсани айтади.
Шу ерда ўтирганларнинг айримларини “драбилкаси” бўлса керак? Бу ўғрилик, бошқа нарса эмас. Ўғриликни жавоби бор туман ҳокимлари, сектор раҳбалари томоша бўлиб турмасин. Ҳар битта туманда экология бўлими бор. Ҳамма ўша ердаги “драбилкаси”ни кўчирсин, бирортаси қолмасин, деди Адиз Бобоев.
Эслатиб ўтамиз Чирчиқ, Сангзор, Зарафшон, Норин, Қашқадарё ва Сурхондарё дарёлари ўзанларидаги норуда материалларни қазиб олишга муддатсиз мораторий жорий қилинган.
Маълумот учун, Адиз Бобоев 2024 йилнинг ноябрь ойида Эркинжон Турдимов ўрнига Самарқанд вилоятига ҳоким этиб тайинланган эди.
Изоҳ (0)