Transport vazirligi huzuridagi Yo‘l-qurilish ishlari sifatini nazorat qilish inspeksiyasi tomonidan respublikadagi ko‘priklar holati o‘rganilganida, daryo va soylarning o‘zanlaridan tosh, qum va shag‘alning nazoratsiz va noqonuniy ravishda qazib olinishi natijasida ayrim ko‘priklarning oraliq tayanchlari kritik qiymatlardan ortiqcha yuvilib ketganligi aniqlandi. Bu haqda inspeksiya matbuot xizmati xabar berdi.
Ma’lum qilinishicha, Vazirlar Mahkamasining 2011-yil 26-dekabrdagi 342-sonli “O‘zbekiston Respublikasi hududidagi avtomobil yo‘llarida xavfsizlikni ta’minlash va tashkil etish chora-tadbirlari to‘g‘risida”gi qarorining 26-bandiga ko‘ra, daryolardagi ko‘priklardan – o‘zan bo‘ylab yuqoriga va pastga qarab 2,5 kilometrgacha bo‘lgan masofada qum va toshlar qazib olish uchun karyerlar barpo etish taqiqlangan.
Qayd etilishicha, mazkur talab bajarilmaganligi oqibatida suv o‘zani sathining pasayishi sababli Samarqand, Surxondaryo, Qashqadaryo, Jizzax, Toshkent va Andijon viloyatlarida barpo qilingan 26ta ko‘prikning tayanchlari kritik holatga kelib qolgan.
Jumladan, Samarqand viloyatidagi Qoradaryo, Zarafshon, Oqdaryo, “Darg‘om” kabi daryo va kanallar ustiga qurilgan 10 ta, Surxondaryo viloyatidagi Obizarang, To‘palang, Surxon, Oltinsoy daryolari ustidan o‘tgan 6 ta, Qashqadaryo viloyatidagi 4 ta, Jizzax viloyatidagi Sangzor daryosi ustidan o‘tgan 3 ta, Toshkent viloyatidagi Chirchiq va Angren daryolari ustidan o‘tgan 2 ta hamda Andijon viloyatidagi Aravonsoy ustidan o‘tgan 1 ta ko‘prik joylashgan o‘zanlarda karyerlar faoliyati tugatilmagan. Ya’ni ular noqonuniy ravishda o‘z faoliyatlarini davom ettirmoqda.Bundan tashqari mazkur ko‘priklarni saqlashga mas’ul bo‘lgan korxonalar tomonidan ularni ta’mirlash, tayanchlarini himoyalash bo‘yicha lozim bo‘lgan chora-tadbirlar amalga oshirilmagan.
Inspeksiya tomonidan ko‘priklarning tayanchlarini yuvilishdan saqlash, yaroqsiz holga kelib qolishining oldini olish, noqonuniy karyerlar faoliyatiga chek qo‘yish bo‘yicha Vazirlar Mahkamasiga tegishli axborotlar kiritildi.
Mavzuga doir:
- Namanganda Norin daryosi ko‘prigi foydalanishga topshirildi. Ko‘prik orqali harakatlanish bundan 6 oy avval to‘xtatilgandi
- Anhor kanali ustidagi piyodalar ko‘prigi ustunlari yemirilayotgani yuzasidan izoh berildi
- Surxondaryoda 6,5 mlrd so‘mga qurilib, 19 oy xizmat ko‘rsatgan ko‘prik ishini viloyat prokuraturasi o‘rgana boshladi
Izoh (0)