Prezidenti farmoni bilan Erkinjon Turdimov Sirdaryo viloyati hokimi vazifasini bajaruvchi etib tayinlandi. Bu haqda davlat rahbari matbuot kotibi xabar berdi.
Erkinjon Turdimov boshqa ishga o‘tishi munosabati bilan 2024-yilning noyabrida Samarqand viloyati hokimi lavozimidan ozod etilgandi. Pezidentning tegishli farmoni bilan Hisob palatasi raisi lavozimida ishlab kelgan Adiz Boboyev Samarqand viloyati hokimi vazifasini bajaruvchi etib tayinlangandi.
Sirdaryo viloyatining avvalgi hokimi Akmaljon Mahmudaliyev 2025-yil 16-yanvar kuni lavozimidan ozod etilgandi. Bunga hududida investitsiyalarni jalb qilish, qishloq xo‘jaligini rivojlantirish va boshqa yo‘nalishlardagi faoliyatda jiddiy kamchiliklarga yo‘l qo‘ygani sabab bo‘ldi.
Erkinjon Turdimov haqida
2024-yil 5-noyabr kuni Erkinjon Turdimov Samarqand viloyati hokimi lavozimiga qayta tasdiqlangandi. U 2018-yil iyuldan beri Samarqand viloyati hokimi lavozimida ishlab keladi.
U 55 yoshda, 1969-yilda Samarqand viloyatida tug‘ilgan. 1991—1995-yillarda “O‘zsanoatqurilishbank” hududiy bo‘limlariga rahbarlik qilgan, 1996-yilgacha Zarafshon hokimi o‘rinbosari lavozimida faoliyat ko‘rsatgan. 1996-yildan 2000-yilgacha Tashqi iqtisodiy faoliyat Milliy bankining Navoiy bo‘limida boshqaruvchisi sifatida ishlagan. 2000-yildan 2008-yilgacha Xatirchi tumani hokimi bo‘lgan. 2008—2016-yillarda Navoiy viloyati hokimi lavozimida ishlagan.
2016-yil dekabridan Samarqand viloyatiga hokim bo‘lguncha Surxondaryo viloyatini boshqarib kelgan.
Turdimov 2006-yilda “Mehnat shuhrati” ordeni bilan, 2024-yil 24-avgustda Fidokorona xizmatlari uchun ordeni bilan mukofotlangan.
Izoh (0)