Zarafshon milliy tabiat bog‘ida yerosti suvlari sathi pasayishi oqibatida daraxtlar qurib qolayotgani aniqlandi

Senatning 43-yalpi majlisida daryolardan qum-shag‘al qazib olishning yerosti suvlari va ekologiyaga salbiy taʼsir ko‘rsatayotgani muhokama qilindi.

Majlisda daryolar o‘zanlarini tozalash va qirg‘oqlarini mustahkamlash, noruda foydali qazilmalarni qazib olishning atrof-muhit, suv va yo‘l xo‘jaligi obyektlariga salbiy taʼsiri yuzasidan Vazirlar Mahkamasiga yuborilgan parlament so‘rovi natijalari ko‘rib chiqilgan.

Unga ko‘ra, Senat qarorida belgilangan bir qator vazifalar ijrosi yetarli darajada taʼminlanmagani, sohadagi dolzarb masalalar o‘z yechimini topmagani aniqlandi.

Xususan:

• daryo o‘zanlarida qum-shag‘al qazib olish faoliyati bilan shug‘ullanayotgan tadbirkorlik subyektlaridan litsenziya yoki shartnoma muddati tugagandan so‘ng kon yoki uchastkani qabul qilib olish tartibi ishlab chiqilmagan;
• daryolardan qum-shag‘al qazib olishning yer osti suvlari va ekologiyaga salbiy taʼsir ko‘rsatayotgani inobatga olib, daryolarni tasarruf etuvchi yagona organni belgilash bo‘yicha taklif kiritilmagan;
• Chirchiq, Zarafshon, Oqdaryo, Qashqadaryo, Sangzor va Qoradaryolaridan sanoat miqyosida qum-shag‘al qazib olishga moratoriy eʼlon qilish masalasi yuzasidan aniq bir qarorga kelinmagan.
• hududlarda noruda foydali qazilmalar hamda qurilish uchun qum, chaqilgan tosh mahsulotlari ishlab chiqarishga mo‘ljallangan ixtisoslashtirilgan sanoat zonalarini tashkil etish bo‘yicha takliflar ishlab chiqilmagan.

Senatorlarning ma’lum qilishicha, Zarafshon daryosi qirg‘og‘ida joylashgan Zarafshon milliy tabiat bog‘i hududida yerosti suvlari sathi 3-4 metrgacha pasayishi oqibatida daraxtlar qurib qolayotgani, Qoradaryo va Oqdaryoda qum va shag‘al noqonuniy qazib olinishi atrof muhit, suv va yo‘l xo‘jaligi obyektlariga salbiy taʼsir ko‘rsatmoqda. Hozirgi kunda daryolarning suv sathi 5 metrga pasayib ketgan hamda daryolar o‘zanlari ustiga qurilgan avtomobil yo‘llaridagi ko‘priklarning tayanch ustunlari ochilib qolgan.

Muhokama yakuni bo‘yicha Senatning tegishli qarori qabul qilindi.