Samarqand viloyati hokimi Erkinjon Turdimov sog‘lig‘i sabab ishdan ketishi haqida xabar berilgan edi. Prezident matbuot xizmati u lavozimidan ozod etilganini tasdiqladi.
Qayd etilishicha, Erkinjon Turdimov boshqa ishga o‘tishi munosabati bilan Samarqand viloyati hokimi lavozimidan ozod etildi. Samarqand viloyati hokimligida o‘tayotgan sessiyada ma’lum qilinishicha, Erkinjon Turdimov Prezident administratsiyasida faoliyatini davom ettiradi.
Pezidentning tegishli farmoni bilan Hisob palatasi raisi lavozimida ishlab kelgan Adiz Boboyev Samarqand viloyati hokimi vazifasini bajaruvchi etib tayinlandi.
Erkinjon Turdimov haqida
2024-yil 5-noyabr kuni Erkinjon Turdimov Samarqand viloyati hokimi lavozimiga qayta tasdiqlangandi. U 2018-yil iyuldan beri Samarqand viloyati hokimi lavozimida ishlab keladi.
U 55 yoshda, 1969-yilda Samarqand viloyatida tug‘ilgan. 1991—1995-yillarda “O‘zsanoatqurilishbank” hududiy bo‘limlariga rahbarlik qilgan, 1996-yilgacha Zarafshon hokimi o‘rinbosari lavozimida faoliyat ko‘rsatgan. 1996-yildan 2000-yilgacha Tashqi iqtisodiy faoliyat Milliy bankining Navoiy bo‘limida boshqaruvchisi sifatida ishlagan. 2000-yildan 2008-yilgacha Xatirchi tumani hokimi bo‘lgan. 2008—2016-yillarda Navoiy viloyati hokimi lavozimida ishlagan.
2016-yil dekabridan Samarqand viloyatiga hokim bo‘lguncha Surxondaryo viloyatini boshqarib kelgan.
Turdimov 2006-yilda “Mehnat shuhrati” ordeni bilan, 2024-yil 24-avgustda Fidokorona xizmatlari uchun ordeni bilan mukofotlangan.
Izoh (0)