Navoiy viloyatida 376 mln so‘mlik tabiiy gazdan noqonuniy foydalanish holati fosh etildi, deb xabar bermoqda “Hududgazta’minot”.
Qayd etilishicha, barcha hududlarida tabiiy gaz ta’minotidagi noqonuniy holatlarni aniqlash va ularni oldini olishga qaratilgan tadbirlar davom ettirilmoqda.
Shunday tadbirlardan biri “Hududgaz Navoiy” gaz ta’minoti filiali komplayens nazorat tuzilmalari, tuman gaz ta’minoti bo‘limi va huquqni muhofaza qiluvchi organlar ishtirokida Navoiy viloyatining Qiziltepa tumanida o‘tkazildi.
Tumanning “O‘zbekiston” MFYda joylashgan davlat maktabgacha ta’lim muassasasi xatlovdan o‘tkazilganda, tashkilot tegishli tartibda gazlashtirish loyiha-texnik hujjatlarini rasmiylashtirmasdan tabiiy gazdan foydalanib kelayotgani aniqlandi. Shuningdek, binoga o‘rnatilgan gaz hisoblash uskunasida bir martalik tamg‘a mavjud emasligi ma’lum bo‘ldi.
Holat yuzasidan dalolatnoma tuzilib, tabiiy gaz sarfi qayta hisob-kitob qilindi va 376 million so‘mlik zarar hisoblandi. Noqonuniy holat bo‘yicha barcha hujjatlar huquq-tartibot organlariga yuborildi.
Gazni o‘g‘irlayotgan ohak sexlari
Mart oyida Samarqand viloyatining Paxtachi tumanida 4 mlrd so‘mlik tabiiy gazdan noqonuniy foydalanilgan yashirin ohak sexi fosh etilgan edi. Aprelda esa Farg‘onada 69,4 mln so‘mlik tabiiy gazdan noqonuniy foydalangan ohak sexi aniqlangan.
May oyida esa yana Farg‘onada 289 mln so‘mlik tabiiy gazdan noqonuniy foydalanib, ohak sexi tashkil etilganligi aniqlangan edi. Avgust oyida Samarqandda 3,3 mlrd so‘mlik tabiiy gazdan noqonuniy foydalanib, ohak sexi tashkil etgan shaxs ushlangandi.
Sentyabrda Farg‘onada gazdan noqonuniy foydalangan ohak sexi mas’ullari davlatga 5,5 mlrd so‘mdan ziyod zarar yetkazdi. Shu bilan birga, aynan Farg‘ona shahrida noqonuniy ohak ishlab chiqarish sexi tashkil qilib, 544,6 mln so‘mlik tabiiy gazni o‘g‘irlaganlar qo‘lga tushgan edi.
Izoh (0)