Навоий вилоятида 376 млн сўмлик табиий газдан ноқонуний фойдаланиш ҳолати фош этилди, деб хабар бермоқда “Ҳудудгазтаъминот”.
Қайд этилишича, барча ҳудудларида табиий газ таъминотидаги ноқонуний ҳолатларни аниқлаш ва уларни олдини олишга қаратилган тадбирлар давом эттирилмоқда.
Шундай тадбирлардан бири “Ҳудудгаз Навоий” газ таъминоти филиали комплаенс назорат тузилмалари, туман газ таъминоти бўлими ва ҳуқуқни муҳофаза қилувчи органлар иштирокида Навоий вилоятининг Қизилтепа туманида ўтказилди.
Туманнинг “Ўзбекистон” МФЙда жойлашган давлат мактабгача таълим муассасаси хатловдан ўтказилганда, ташкилот тегишли тартибда газлаштириш лойиҳа-техник ҳужжатларини расмийлаштирмасдан табиий газдан фойдаланиб келаётгани аниқланди. Шунингдек, бинога ўрнатилган газ ҳисоблаш ускунасида бир марталик тамға мавжуд эмаслиги маълум бўлди.
Ҳолат юзасидан далолатнома тузилиб, табиий газ сарфи қайта ҳисоб-китоб қилинди ва 376 миллион сўмлик зарар ҳисобланди. Ноқонуний ҳолат бўйича барча ҳужжатлар ҳуқуқ-тартибот органларига юборилди.
Газни ўғирлаётган оҳак цехлари
Март ойида Самарқанд вилоятининг Пахтачи туманида 4 млрд сўмлик табиий газдан ноқонуний фойдаланилган яширин оҳак цехи фош этилган эди. Апрелда эса Фарғонада 69,4 млн сўмлик табиий газдан ноқонуний фойдаланган оҳак цехи аниқланган.
Май ойида эса яна Фарғонада 289 млн сўмлик табиий газдан ноқонуний фойдаланиб, оҳак цехи ташкил этилганлиги аниқланган эди. Август ойида Самарқандда 3,3 млрд сўмлик табиий газдан ноқонуний фойдаланиб, оҳак цехи ташкил этган шахс ушланганди.
Сентябрда Фарғонада газдан ноқонуний фойдаланган оҳак цехи масъуллари давлатга 5,5 млрд сўмдан зиёд зарар етказди. Шу билан бирга, айнан Фарғона шаҳрида ноқонуний оҳак ишлаб чиқариш цехи ташкил қилиб, 544,6 млн сўмлик табиий газни ўғирлаганлар қўлга тушган эди.
Изоҳ (0)