O‘zbekistonda elektr va gaz iste’moli uchun ijtimoiy me’yorlarning amal qilish muddatlari ob-havo sharoitlaridan kelib chiqib qayta ko‘rib chiqiladi. Bu Vazirlar Mahkamasining 28-fevraldagi qarorida nazarda tutilgan.
2024-yil 1-maydan boshlab maishiy iste’molchilar (aholi xonadonlari) uchun elektr energiyasi va tabiiy gazdan foydalanishda ijtimoiy (bazaviy) me’yorlar kiritilgan edi.
“Havo haroratidan kelib chiqib, Energetika vazirligi Vazirlar Mahkamasi bilan kelishgan holda, mazkur bazaviy me’yorlarning isitish va boshqa mavsumlardagi amal qilish muddatlariga o‘zgartirish kiritishi mumkin”, deyiladi hujjatda.
Energetika vazirligi, “Hududiy elektr tarmoqlari” AJ va “Hududgazta’minot” AJ bazaviy me’yorlarning amal qilish muddatlariga kiritilgan o‘zgartirishlar to‘g‘risida o‘zining rasmiy veb-sayti hamda ommaviy axborot vositalari orqali e’lon qilib boradi.
Ushbu vakolat doirasida O‘zbekistonda tabiiy gaz uchun isitish mavsumida belgilangan bazaviy me’yor 1-aprelga qadar uzaytirildi. 1-martdan mamlakatda isitish mavsumida tabiiy gaz uchun joriy qilingan 500 kubometrlik bazaviy me’yor 100 kubometrga tushirilishi belgilangan edi. Mart oyida havo haroratining past bo‘lishi, hatto ayrim kunlari kechasi va kunduzi harorat 0 darajadan tushib, odatdagidan ko‘ra sovuqroq kelishi kutilayotgani, qolaversa, aholiga qulaylik yaratish maqsadida, davlat rahbarining topshirig‘iga muvofiq, Vazirlar Mahkamasining tegishli qarori bilan isitish mavsumi uchun belgilangan 500 kubometr bazaviy me’yor 2025-yilning 1-apreligacha uzaytirildi.
Izoh (0)