Qashqadaryoning Chiroqchi tumanidagi maktabda o‘quvchi va o‘qituvchi o‘rtasida kelishmovchilik yuzaga kelgani aks etgan video ijtimoiy tarmoqlarda tarqaldi. Rasmiylar holatni o‘rganib, tegishli jazo tayinlanganini ma’lum qildi.
Bolalar ombudsmanining bildirishicha, 8-fevral kuni 8-sinf o‘quvchilari B.N. va E.S. ingliz tili fani darsi vaqtida o‘zaro tortishib turli so‘zlar bilan bir-birini haqorat qilgan. O‘qituvchi E.F. o‘quvchiga darsdan chiqib ketishini aytgan, biroq o‘quvchi o‘qituvchining talabiga bo‘ysunmasdan unga nisbatan noo‘rin so‘zlar ishlatgan.
Mazkur holat yuzasidan xizmat tekshiruvi tayinlanib, tegishli tartibda o‘rganish olib borildi hamda pedagog xodimlarga nisbatan intizomiy jazo chorasi qo‘llandi.
Maktab tartib-qoidalarini buzgan o‘quvchilarning ota-onalariga nisbatan Ma’muriy javobgarlik to‘g‘risidagi kodeksning 47-moddasiga (bolalarni tarbiyalash va ularga ta’lim berish borasidagi majburiyatlarni bajarmaslik) ko‘ra ma’muriy bayonnoma rasmiylashtirildi. Ushbu moddada BHMning 1 baravaridan 5 baravarigacha (375 ming so‘mdan 1 million 875 ming so‘mgacha) miqdorda jarima belgilangan.
Qashqadaryo viloyati Maktabgacha va maktab ta’limi boshqarmasi ham Chiroqchi tumanidagi 34-umumiy o‘rta ta’lim maktabida yuz bergan holat yuzasidan munosabat bildirdi.
“Keyingi yillarda mamlakatimizda ta’lim tashkilotlarining pedagog xodimlarining o‘z xizmat vazifalariga aralashish hamda ularni obrosizlantirish holatlariga qarshi kurashish ishlari amalga oshirilmoqda. Shuningdek, farzand tarbiyasida ota-onalarning ham yetarli majburiyatlari borligini va salbiy holatlarni keltirib chiqarganlik uchun qonunchilikda jazo chorasi borligini maʼlum qilamiz”, deyiladi munosabatda.
Avvalroq Sirdaryo viloyatidagi maktabda ayol dars vaqtida sinfga bostirib kirib, o‘qituvchini urgandi. Holat bo‘yicha ma’muriy ish qo‘zg‘atilib, Jinoyat ishlari bo‘yicha Sirdaryo tuman sudida ko‘rib chiqildi va ayol ruhiy kasalliklar shifoxonasiga joylashtirildi. Ayolning o‘zi qilmishi uchun uzr so‘rab chiqdi.
Shundan so‘ng maktabgacha va maktab ta’limi vaziri Hilola Umarova munosabat bilan chiqib, kabi zo‘ravonlik holatlari yuz berganda o‘qituvchi-pedagoglarni himoya qilish uchun kerakli yuridik, ijtimoiy, psixologik yordam berilishini bildirdi.
“Shuni tushunib olishimiz kerakki, maktabga duch kelgan odam (dars vaqtida hatto ota-ona ham) istaganicha kirib-chiqish, dars jarayoni va pedagoglar faoliyatiga aralashish, o‘qituvchiga do‘q qilish uyoqda tursin, madaniyat chegarasidan chetga chiqib gaplashishga haqli emas”, dedi vazir.
Hilola Umarova o‘qituvchilar, pedagoglar qadr-qimmatingizni himoya qilish uchun barcha imkoniyatlarni ishga solishga tayyorligini ta’kidladi.
“Pedagogning maqomi to‘g‘risida”gi qonunning 3-moddasida pedagogning huquqlari, sha’ni, qadr-qimmati va ishchanlik obro‘si davlat himoyasi ostida bo‘lishi belgilab qo‘yilgan.
Maktabda o‘qituvchilarning kaltaklanishi
2024-yilning oktyabrida Sirdaryo tumanidagi 2-maktabda ikki o‘quvchi qiz o‘qituvchini urgandi. O‘sha yilning aprelida Farg‘onada maktab o‘qituvchisi o‘quvchining qarindoshlari tomonidan kaltaklangandi. 2023-yilning mayida Farg‘ona viloyati Toshloq tumanidagi maktabning boshlang‘ich sinf o‘qituvchisi o‘quvchisining onasi tomonidan kaltaklangandi.
Izoh (0)