Maktabgacha va maktab ta’limi vaziri Hilola Umarova o‘qituvchilar qadr-qimmatini himoya qilish uchun barcha imkoniyatlar ishga solinishini ma’lum qildi.
“Afsuski, ijtimoiy tarmoqlarda dars vaqtida sinfxonaga bostirib kirish, o‘qituvchini haqoratlash, o‘quvchilar oldida izza qilish, hatto do‘pposlash holatlari tez-tez muhokama markaziga chiqyapti. Yaqinda Sirdaryoda bo‘lgan holat ham shular jumlasidandir”, deydi vazir.
Maktabgacha va maktab ta’limi vaziri Sardoba tumanidagi 1-sonli maktabda yuz bergan, ayol dars vaqtida sinfga bostirib kirib, o‘qituvchini urgandi. Holat bo‘yicha ma’muriy ish qo‘zg‘atilib, Jinoyat ishlari bo‘yicha Sirdaryo tuman sudida ko‘rib chiqildi va ayol ruhiy kasalliklar shifoxonasiga joylashtirildi.
Hilola Umarova bu kani zo‘ravonlik holatlari yuz berganda tegishlicha murojaat qilinib, aybdorlarga chora ko‘rilganini, shunday holatlar yuz berganda o‘qituvchi-pedagoglarini himoya qilish uchun kerakli yuridik, ijtimoiy, psixologik yordam berilishini bildirib o‘tdi.
“Shuni tushunib olishimiz kerakki, maktabga duch kelgan odam (dars vaqtida hatto ota-ona ham) istaganicha kirib-chiqish, dars jarayoni va pedagoglar faoliyatiga aralashish, o‘qituvchiga do‘q qilish uyoqda tursin, madaniyat chegarasidan chetga chiqib gaplashishga haqli emas”, deydi maktabgacha va maktab ta’limi vaziri.
Hilola Umarova bunday holatlar aniqlansa vazirlik zudlik bilan huquq-tartibot idoralariga murojaat qilishini ta’kidlab o‘tdi.
“Hurmatli o‘qituvchilar, jonkuyar pedagoglar, qadrli jamoamiz, sizning faoliyatingiz qonun bilan himoyalangan, qadr-qimmatingizni himoya qilish uchun barcha imkoniyatimizni ishga solishga tayyormiz”, dedi u.
“Pedagogning maqomi to‘g‘risida”gi qnunning 3-moddasida pedagogning huquqlari, sha’ni, qadr-qimmati va ishchanlik obro‘si davlat himoyasi ostida bo‘lishi belgilab qo‘yilgan.
Izoh (0)