Sirdaryodagi maktabda o‘quvchining onasi o‘qituvchini urdi (video)

Ijtimoiy tarmoqlarda Sardoba tumanidagi 1-sonli maktabda ayol o‘qituvchini urgani aks etgan video tarqaldi.

Videoda ayol (o‘quvchining onasi deb taxmin qilinmoqda) sinfda o‘qituvchiga qo‘pol muomalada bo‘lib, uning yuziga musht tushurgani, o‘ldirish bilan tahdid qilganini ko‘rish mumkin. Bunga nima sabab bo‘lgani hozircha noma’lum. Tarmoqda tarqalgan xabarlarga ko‘ra, o‘qituvchi yaxshi o‘qimagan o‘quvchiga jiddiy tanbeh bergani uchun uning onasi kelib shunday yo‘l tutgan. 

Viloyat maktabgacha va maktab ta’limi boshqarmasi holat Sardoba tumanidagi 1-sonli maktabda sodir bo‘lganini tasdiqladi. Voqeaga maktabgacha va maktab ta’limi vaziri Hilola Umarova ham munosabat bildirib, holat Maktabgacha va maktab ta’limi vazirligi tomonidan nazoratga olinganini ma’lum qildi. Vazir bu voqea Sirdaryo viloyat MMTB ishchi guruhi tomonidan o‘rganilayotganini, o‘rganish natijalariga ko‘ra tez orada jamoatchilikka qo‘shimcha ma’lumot berilishini bildirdi.

Maktabda o‘qituvchilarning kaltaklanishi

2024-yilning oktyabrida Sirdaryo tumanidagi 2-maktabda ikki o‘quvchi qiz o‘qituvchini urgandi. O‘sha yilning aprelida Farg‘onada maktab o‘qituvchisi o‘quvchining qarindoshlari tomonidan kaltaklangandi. 2023-yilning mayida Farg‘ona viloyati Toshloq tumanidagi maktabning boshlang‘ich sinf o‘qituvchisi o‘quvchisining onasi tomonidan kaltaklangandi.