Markaziy bank tijorat banklaridagi omonatlardan pul yechishda isteʼmolchidan mablag‘ning manbasi so‘ralayotgani haqida tarqalgan xabarlarga izoh berdi.
Maʼlum qilinishicha, jismoniy shaxslar o‘zlariga tegishli omonat hisobvaraqlaridan pul mablag‘larini yechib olayotganda ushbu mablag‘ning kelib chiqish manbasi to‘g‘risida maʼlumot talab qilinmaydi.
Taʼkidlanishicha, Markaziy bank moliyaviy xizmatlar ko‘rsatilishiga doir yuzaga kelayotgan muammo va kamchiliklarni aholi va tadbirkorlik subyektlarining murojaatlari hamda boshqa manbalar orqali doimiy ravishda o‘rganib, ularni bartaraf etish choralarini ko‘rib boradi.
MB fuqarolardan banklardagi omonatdan pul yechishda uning kelib chiqish manbasi to‘g‘risida maʼlumot talab qilinsa, 71 212-60-94 va 71 212-73-62 raqamlari orqali bog‘lanishni tavsiya qildi.
Shu bilan birga, banklar, mikromoliya va to‘lov tashkilotlari faoliyatida xizmatlar ko‘rsatilishiga oid isteʼmolchilarning huquqlari buzilayotgani yuzasidan murojaatlar yoki takliflar bo‘lsa, ularni Markaziy bankning info@cbu.uz elektron manziliga yuborish so‘raladi, deya qo‘shimcha qilinadi xabarda.
Avvalroq kafolatlangan omonatlarni 200 mln so‘mgacha cheklashga qaratilgan qonun maʼqullangandi. Bank tugatilganda kompensatsiya to‘lovi 2025-yil 1-yanvardan boshlab 20 ish kuni, 2026-yil 1-yanvardan 15 ish kuni, 2027-yil 1-yanvardan 7 ish kuni mobaynida amalga oshiriladi.
Izoh (0)