Buyuk Britaniyada ikkinchi jahon urushi faxriysi, koronavirusga qarshi kurashda shifokorlarga yordam berish maqsadida xayriya jamg‘armasi tashkil qilgan va 32 million funt sterlingdan ko‘proq mablag‘ yig‘gan, qirolicha Yelizavetta tomonidan ritsarlik unvoni berilgan 100 yoshli Tomas Mur vafot etdi. Bu haqda Sky News telekanali xabar bergan.
Mur 31-yanvar kuni Bedfordda kasalxonaga yotqizilgandi. U bir necha haftadan buyon pnevmoniyadan davolanayotgandi va koronavirus yuqtirib olgani tufayli kasalxonaga tushgandi.
— Captain Sir Tom Moore (@captaintommoore) February 2, 2021
Mur nafaqat Buyuk Britaniyada, balki butun dunyoda mashhur keksa odamlardan biri edi. U 1920-yil 30-aprelda tug‘ilgan, 100 yoshga kirish arafasida Tom’s 100th Birthday Walk For The NHS (Tomning 100 yoshida NHS uchun piyoda sayr) deb nomlangan shaxsiy xayriya jamg‘armasini ochgan. Xayriya doirasida u o‘z bog‘i atrofida 100 aylana yurishga va pandemiyaga qarshi kurashda Milliy sog‘liqni saqlash xizmatini qo‘llab-quvvatlash uchun 1000 funt sterling yig‘ishga va’da bergan.
2020-yil aprel oyi oxiriga qadar yig‘ilgan pullar 32 million funtdan oshib ketdi, Mur milliy qahramonga aylandi. 800 mingdan ortiq odam unga ritsarlik unvoni berilishini so‘rab petitsiya imzoladi.
Murga ritsarlik unvonini berish marosimi 2020-yilning iyul oyida o‘tkazilgandi.
Shaxsiy xayriya aksiyasidan tashqari Tom Mur You’ll Never Walk Alone klassik qo‘shig‘ini ijro etishda ham ishtirok etgan va ushbu qo‘shiq Britaniya chartida birinchi o‘ringa chiqqan, dastlabki 48 soat ichida sotilgan yozuvlar nusxalari esa barcha rekordlarni yangilagan.
Izoh (0)