“Manchester Siti” klubi yarim himoyachisi Ilkay Gundo‘g‘an faoliyatini Germaniya Bundesligasida davom ettirishi mumkin. Insayder Nikolo Skiraning xabariga ko‘ra, Leverkuzenning “Bayer” klubi 34 yoshli futbolchi bilan bog‘liq ma’lumotlarni “shaharliklar” rahbariyatidan so‘ragan.
Manbalarga ko‘ra, Gundo‘g‘an “Manchester Siti” bosh murabbiyi Xosep Gvardiolaning yangi mavsum rejalariga kiritilmagan. Shu sababli, futbolchining jamoani tark etishi kutilmoqda.
Shuningdek, Calciomercato nashrining ma’lumot berishicha, Gundo‘g‘an bilan Italiya chempionatining bir qator klublari ham qiziqmoqda. Jumladan, “Yuventus” va “Inter” klublari futbolchining agenti bilan bog‘langan. Ma’lumotlarga ko‘ra, Gundo‘g‘anning A Seriyada o‘ynash istagi mavjud va bu qarorga uning rafiqasi Sara Montebellunaning Italiyada tug‘ilgani ham ma’lum darajada ta’sir qilgan.
“Manchester Siti” rahbariyati esa Gundo‘g‘anning jamoadan ketishiga qarshi emas. Sababi futbolchining yillik maoshi 8 million yevroni tashkil qiladi. Shu bois ular Ilkayning transferiga “yashil chiroq yoqqan”. Klub ushbu jarayonni yozgi transfer oynasi yopilguniga qadar yakunlashni rejalashtirmoqda.
Ilkay Gundo‘g‘an “Manchester Siti”ga 2016-yil yozida Dortmundning “Borussiya” klubidan o‘tgan va 2023-yilgacha ingliz klubi safida to‘p surgan. 2023-yil yozida esa u “Barselona” safiga qo‘shilib, bir mavsum Ispaniyada o‘ynadi. 2024-yil yozida esa Angliyaga qaytib, “Siti” bilan ikki yillik shartnoma imzolagan.
Transfermarkt portali ma’lumotiga ko‘ra, Gundo‘g‘anning transfer qiymati 5 million yevroni tashkil qiladi.
Izoh (0)