Bir necha daqiqa oldin O‘zbekiston prezidentining Malayziyaga so‘nggi 20 yil ichidagi ilk rasmiy tashrifi yakuniga yetdi. Prezident matbuot kotibi Sherzod Asadov ushbu tashrif xususida fikrlarini bildirdi.
Sherzod Asadov diplomatik tajribasi va matbuot kotibi sifatidagi faoliyatiga asoslanib ikki mamlakat rahbarlari o‘rtasidagi samimiy munosabat va norasmiy muloqot juda yorqin taassurot qoldirganini taʼkidladi.
Taʼkidlanishicha, ushbu go‘zal va mehmondo‘st mamlakat rahbariyati O‘zbekiston yetakchisi bilan samimiy uchrashuvlar o‘tkazish uchun qatʼiy protokol qoidalaridan chekinib, yuksak hurmat va ishonch namoyish etdi.
“Xususan, prezidentimizni kutib olishga Malayziya parlamenti spikeri chiqqani, malayziyalik hamkasblarimizning aytishicha, ushbu mamlakat protokol amaliyotida ilgari kuzatilmagan voqea bo‘ldi. Bundan tashqari, Malayziya bosh vaziri Anvar Ibrohim prezidentimiz Shavkat Mirziyoyevga butun kun davomida, barcha rasmiy tadbir va uchrashuvlarda hamrohlik qildi. Hattoki muloqotni davom ettirish uchun O‘zbekiston prezidentiga ajratilgan qarorgohga shaxsan tashrif buyurdi. Keyin ular birgalikda, bir mashinada Petronas bosh qarorgohiga yo‘l olishdi, u yerda kompaniya rahbariyati bilan uchrashuv o‘tkazishdi.
O‘zbekiston prezidenti sharafiga uyushtirilgan rasmiy qabul marosimida Malayziya sanʼatkorlari o‘zining boy tarixi va madaniyati bilan bir qatorda xalqimizning kuy-qo‘shiqlari, raqslaridan iborat konsert dasturini namoyish etgani ham alohida eʼtibor ifodasi bo‘ldi”, deb yozadi O‘zbekiston prezidenti matbuot kotibi.
Sherzod Asadov bunday norasmiy va samimiy munosabat ikki yetakchi o‘rtasidagi yaqin do‘stlikdan, O‘zbekiston va Malayziya xalqlarining bir biriga bo‘lgan yuksak hurmati, ikki tomonlama munosabatlarning porloq istiqbolidan dalolat berishini alohida taʼkidladi.
Izoh (0)