Shavkat Mirziyoyev Respublika ixtisoslashtirilgan xirurgiya ilmiy-amaliy tibbiyot markazi jamoasiga minnatdorlik bildirdi

Shavkat Mirziyoyev Vosit Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazi jamoasiga minnatdorlik bildirdi. Bu haqda prezident matbuot kotibi Sherzod Asadov xabar berdi. 

Qayd etilishicha, Vosit Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazi o‘zining 50 yilligini nishonlanmoqda. Sana munosabati bilan tashkil etilgan tadbirda Sherzod Asadov prezidentning markaz jamoasiga tabrigini o‘qib eshittirdi.

“O‘zbekistonda jarrohlik bo‘yicha yetakchi va nufuzli muassasa hisoblangan ushbu markaz ko‘pmillatli ahil jamoasining fidokorona mehnati bilan mamlakatimiz sog‘liqni saqlash tizimida alohida o‘rin egallab kelayotganini barchamiz yaxshi bilamiz va yuksak qadrlaymiz”, deyiladi davlat rahbarining qutlovida.

So‘nggi yillarda mazkur shifoxonada 200 dan ortiq yangi jarrohlik amaliyoti joriy etilib, eng murakkab va yuqori texnologik operatsiyalar bajarilmoqda. Tabrikda qayd etilganidek, og‘ir xastaliklardan aziyat chekayotgan qancha-qancha yurtdoshlar ko‘p vaqt va mablag‘ evaziga xorijdagi klinikalarga borish azobidan qutulib, O‘zbekistonda davo topmoqda. 

Bunday natijalarga erishishda mamlakatda xirurgiya xizmatini isloh qilish, hududlarda uning sifatini oshirish va ko‘lamini kengaytirish, markaz va uning filiallari moddiy-texnik bazasi hamda kadrlar salohiyatini mustahkamlash borasidagi ishlar muhim omil bo‘lmoqda.

Prezident markazning butun jamoasiga minnatdorlik bildirib, tilaklarini izhor etdi. Shuningdek, tadbirda prezident farmoni bilan mukofotlangan markaz xodimlariga faxriy unvon, orden va medallar topshirildi.