Prezident Shavkat Mirziyoyev ishtirokida o‘tgan MDH davlat rahbarlari kengashi majlisi doirasida MDH bosh kotibining o‘rinbosari, O‘zbekiston diplomati Ilhom To‘ychiyevich Neʼmatovni Rossiya Federatsiyasining “Do‘stlik” (“Drujba”) ordeni bilan taqdirlash marosimi bo‘lib o‘tdi. Bu haqda Prezident matbuot kotibi Sherzod Asadov xabar berdi.
Maʼlum qilinishicha, Rossiya prezidenti Vladimir Putin Ilhom Neʼmatovning MDHni rivojlantirishdagi xizmatlarini, O‘zbekistonning Rossiyadagi elchisi sifatidagi faoliyati davomida mamlakatlar o‘rtasidagi munosabatlarni mustahkamlashga qo‘shgan katta hissasini qayd etib, mukofotni topshirgan.
Ilhom Neʼmatov 1952-yili Namangan viloyatida tug‘ilgan. U 2008—2010-yillarda O‘zbekistonning Rossiyadagi favqulodda va muxtor elchisi lavozimida faoliyat yuritgan.
2018—2020-yillarda O‘zbekiston tashqi ishlar vazirining birinchi o‘rinbosari, 2020—2021-yillarda tashqi ishlar vazirining o‘rinbosari bo‘lib ishlagan.
Ilhom Neʼmatov 2021-yildan MDH ijro qo‘mitasi raisining o‘rinbosari sifatida faoliyat yuritmoqda.
Izoh (0)