20-avgust kuni prezident Shavkat Mirziyoyev va tadbirkorlar uchrashuvida mamlakatda mikromoliya banklari ochishga ruxsat berilishi aytildi. Bu haqda prezident matbuot kotibi Sherzod Asadov xabar berdi.
Muloqotda respublikada ustav kapitali kamida 50 milliard so‘m bo‘lgan mikromoliya banklarini tashkil etishga ruxsat berilishi maʼlum qilingan. Mazkur turdagi banklar kredit portfelining kamida 70 foizi kichik va o‘rta biznesni moliyalashtirishga yo‘naltiriladi.
Mikromoliya tashkilotlari tomonidan tadbirkorlarga xorijiy valyutada xizmat ko‘rsatish va litsenziya asosida to‘lov tashkiloti sifatida faoliyat yuritishga ruxsat beriladi.
“Mikromoliya bozori uchun yo‘l ochib berildi. Masalan, o‘tgan yetti oyda 91 ta mikromoliya tashkiloti 6,6 trillion so‘mlik moliyaviy xizmatlar ko‘rsatdi va yil yakunigacha bu raqam 12 trillion so‘mga yetkaziladi. Mikromoliya xizmatlarini davlat tomonidan qo‘llab-quvvatlash davom ettiriladi. Ularga joriy yildagi 1,6 trillion so‘mga qo‘shimcha 1 trillion so‘m resurs ajratiladi”, deyiladi xabarda.
2023-yil 11-noyabrda qabul qilingan prezident qarori bilan mikromoliya banklari tashkil etilishiga ruxsat berilgandi. Hujjatda 2024-yil 1-aprelgacha sohaga oid qonunlarga o‘zgartirish va qo‘shimchalar kiritish kerakligi yozilgan. Xususan, mikromoliya banklarining tashkiliy–huquqiy shaklini, ular amalga oshiradigan moliyaviy operatsiyalar turlarini ko‘rsatish lozimligi belgilangan.
Shu bilan birga, qarorda mikromoliya banklariga aholi va yuridik shaxslardan omonat (depozit) jalb qilish va ularga mikromoliyaviy xizmatlarni ko‘rsatish huquqini berish nazarda tutilgan. Mikromoliya tashkilotlarini mikromoliya banklariga va mikromoliya banklarini tijorat banklariga hamda aksincha transformatsiya qilish tartibini belgilash zarurligi ko‘rsatib o‘tilgan.
Izoh (0)