5-fevral kuni Perdana Putra hukumat majmuasida Shavkat Mirziyoyev va Malayziya bosh vaziri Anvar Ibrohim tor doirada va rasmiy delegatsiyalar ishtirokida muzokara o‘tkazdi.
-owcuRxZV.jpg)
Prezident matbuot xizmatining xabar qilishicha, unda O‘zbekiston bilan Malayziya o‘rtasidagi do‘stlik va sheriklik munosabatlarini yanada kengaytirish va mustahkamlash masalalari ko‘rib chiqildi.
Hamkorlikni rivojlantirish va oliy darajadagi kelishuvlarni amalga oshirishni samarali muvofiqlashtirish maqsadida Tashqi ishlar vazirlarining strategik muloqoti platformasini tashkil etishga qaror qilindi. BMT, Islom hamkorlik tashkiloti va boshqa xalqaro tuzilmalar doirasida bir-birimizni qo‘llab-quvvatlashni davom ettirish muhimligi qayd etildi.
-2A4WPzou.jpg)
Savdo-iqtisodiy va investitsiya sohalaridagi amaliy hamkorlik masalalariga alohida e’tibor qaratildi. Tovar ayirboshlashni ko‘paytirish maqsadida Imtiyozli savdo to‘g‘risidagi bitimni ishlab chiqish, o‘zaro sanoat ko‘rgazmalarini o‘tkazish, Sanoat kooperatsiyasi dasturini qabul qilishga kelishib olindi.
Malayziya hukumati O‘zbekistonning Jahon savdo tashkilotiga a’zo bo‘lishini faol qo‘llab-quvvatlamoqda.
Yetakchilar 2025—2026-yillarni O‘zbekiston—Malayziya sherikligini innovatsion rivojlantirish davri deb e’lon qilishga kelishib oldi.
Iqtisodiy hamkorlikning yangi modelining muhim yo‘nalishlari belgilab olindi. Bular – neft-kimyo va kimyo, elektronika va yarimo‘tkazgichlar sanoati, innovatsion sanoat, “aqlli” qishloq xo‘jaligi, “yashil” energetika, ziyorat turizmi va boshqalar.
Kooperatsiya loyihalarini qo‘llab-quvvatlash maqsadida Toshkent viloyatida Malayziyaning yetakchi kompaniyasi boshqaruvida maxsus iqtisodiy zona tashkil etilmoqda. Davlat rahbarlari faol madaniy-gumanitar almashinuvni davom ettirish muhimligini ta’kidladi. 2025-yilda O‘zbekiston va Malayziyada madaniyat haftaliklari o‘tkaziladi.
Yetakchilar mintaqaviy hamkorlikning dolzarb masalalari yuzasidan ham fikr almashdi. Terrorizm, radikalizm va islomofobiyaga qarshi kurashda sa’y-harakatlarni birlashtirish muhimligi qayd etildi.
Muzokaralar yakunida erishilgan kelishuvlarni o‘z vaqtida va sifatli amalga oshirish bo‘yicha “yo‘l xaritasi”ni tayyorlashga qaror qilindi.
Yakunda Shavkat Mirziyoyev Malayziya bosh vaziri Anvar Ibrohimni rasmiy tashrif bilan O‘zbekistonga kelishga taklif etdi.
Shavkat Mirziyoyev Malayziya bosh vaziri Anvar Ibrohimning taklifiga binoan 4-fevral kuni kechqurun rasmiy tashrif bilan ushbu mamlakatga yetib bordi. Prezident aeroportda Malayziya parlamenti spikeri bilan uchrashuv o‘tkazdi. Bo‘lajak oliy darajadagi uchrashuvlar kun tartibi yuzasidan fikr almashildi.
5-fevral kuni Kuala-Lumpur shahridagi “Perdana Putra” hukumat majmuasida 5-fevral kuni Shavkat Mirziyoyevni rasmiy kutib olish marosimi bo‘lib o‘tdi. Marosimdan so‘ng oliy darajadagi muzokaralar boshlandi.
Izoh (0)