O‘zbekistonda xususiy korxonalarda ishlayotgan 1 milliondan ortiq ishchilar oyligi 5 million so‘mdan ko‘p. Bu haqda prezident Shavkat Mirziyoyevning tadbirkorlar bilan uchrashuvida maʼlum qilindi.
Prezident matbuot kotibi Sherzod Asadov xabariga ko‘ra, muloqotda bugun respublikada 100 tadan ortiq ishchisi bor korxonalar 3 mingtaga yaqinlashgani aytilgan. Ulardagi ish o‘rni bir yilda 440 mingga ko‘paygan.
“Xususiy sektorda 5 million so‘mdan ko‘p maosh oladigan ishchilar 1 milliondan oshdi. Shundan 370 mingi 10 million so‘mdan ziyod oylik oladi. Bular tadbirkorlarimiz ‘soyada’ ishlashdan ko‘ra qonuniy faoliyat, sog‘lom raqobatni manfaatli deb bilayotganidan dalolat”, deya prezident so‘zlarini qayd etgan Asadov.
Uchrashuvda tadbirkorlik reytingida “A” va “B” – yaxshi toifaga kiruvchi korxonalar 91 mingga ko‘paygani, yana 170 ming korxona “D” – eng yomon toifadan chiqarilgani ham taʼkidlangan.
“Buning hisobiga soliq tekshiruvlari o‘tgan yilga nisbatan 2 karra, jumladan, kameral tekshiruvlar 3 karra qisqardi. Shu davrda yirik soliq to‘lovchilar tushumlari 10 foizga, viloyat darajasidagi korxonalarda 25 foizga, tuman tadbirkorlari to‘layotgan soliqlar 40 foizga o‘sdi”, deyiladi manba xabarida.
Muloqotda tahlil qilinishicha, joriy yilda o‘zbekistonlik tadbirkorlarning tovar aylanmasi o‘tgan yilga nisbatan 25 foizga o‘sgan va 986 trillion so‘mga yetgan. Yillik aylanmasi 10 milliard so‘mdan 100 milliard so‘mgacha bo‘lgan o‘rta korxonalar 2 karra ko‘paygan.
Aylanmasi 100 milliard so‘mdan ortiq yirik korxonalar esa 2 ming 200 tadan oshgan. Bu ham o‘tgan yilga nisbatan 2 baravar ko‘p.
Soliq, bank, moliya, butun iqtisodiyot kompleksi “mahallabay” va “mijozbay” ishlashni boshlagani natijasida oldin zarar bilan ishlagan 16 ming korxona yarim yilda 6,5 trillion so‘m foydaga chiqqan.
Eslatib o‘tamiz, Shavkat Mirziyoyev Qoraqalpog‘istonga tashrifini 19-avgust kuni boshladi. Prezident mazkur hududga so‘nggi marta 2023-yilning mart oyida borgandi.
Izoh (0)