Nyu Yorkda noma’lum shaxslar ko‘ngilxushlik uchun metro poyezdini olib qochdi. Bu haqda CBS News telekanali shahar politsiyasi vakillariga tayanib xabar bermoqda.
Hodisa 25-yanvar kuni kechqurun sodir bo‘lgan. O‘smir yigitlar guruhi Bruklindagi Forest-Hills —71-avenyu bekati yonidagi to‘xtash joyida turgan tarkibga kirishgan. Jinoyatchilar mashinistning kabinasiga kirib, mustaqil ravishda poyezd boshqaruvini ishga tushirgan.
Ular metroda sayr qilish bilan cheklanib qolmay, vagonlar ichidagi kuzatuv kameralariga ham zarar yetkazgan. Sayohat tugagach, o‘smirlar tarkibni tark etib, noma’lum yo‘nalishga g‘oyib bo‘lishgan.
Nyu York politsiyasi ma’lumotlariga ko‘ra, R poyezdi Kvinsdagi zaxira yo‘lda qoldirilgan. Zaxira yo‘l poyezdlar ishlatilmayotgan paytda ularni saqlash uchun qo‘llaniladi.
Metropolitan transport boshqarmasining (MTB) xabar qilishicha, R 9108 poyezdi boshqarma xodimlari tomonidan nazoratsiz qoldirilgan. Xodimlar qaytib kelganlarida, poyezdning dastlabki joyidan ko‘chirilganini aniqlaganlar.
Xabarda ta’kidlanishicha, poyezdning eshiklari berk bo‘lgan, bu kimdir tranzit kalitlaridan foydalangan holda poyezdga kirganidan dalolat beradi.
Ular, aftidan, poyezd qayerdaligi, uni qanday boshqarish va kalitlarni qanday olish haqida ma’lumotga ega bo‘lgan, deydi transport bo‘yicha ekspert Robert Pasvell.
Yigitlar poyezdni qancha vaqt boshqargani va qancha masofagacha olib ketgani noma’lum. Ijtimoiy tarmoqlarda tarqalgan videotasvirlarda poyezd yuqori tezlikda harakatlanganini ko‘rish mumkin. Rasmiylarning ta’kidlashicha, qora kiyimli qoidabuzarlar poyezd ichidagi kamera obyektivlarini qora marker bilan bo‘yagan.
MTB xodimlari poyezd qora qutisidagi ma’lumotlarni tahlil qilish va qayerda, qancha vaqt bo‘lganini aniqlash uchun Kvins temiryo‘l stansiyasiga yuborgan.
Hozirda huquqni muhofaza qiluvchi organlar gumonlanuvchilarning shaxsini aniqlash bilan shug‘ullanmoqda. Nyu York aholisi aybdorlar aniqlanib, munosib jazoga tortilishiga umid bildirmoqda.
Rasmiylarga ko‘ra, bunday holatlar birinchi marta sodir bo‘lishi emas.
Xususan, 2024-yil sentyabr oyida ikki nafar voyaga yetmagan — 17 yoshli qiz va yigit metro poyezdini olib qochib, boshqa tarkib bilan to‘qnashuvga sabab bo‘lgan. Hodisa jiddiy tus olgan bo‘lsa-da, jabrlanganlar bo‘lmagan. Voqea sodir bo‘lgan joydan qochgan o‘smirlar qo‘lga olingan.
Xuddi shunday holat o‘sha yilning yanvar oyida ham sodir bo‘lgan, o‘shanda bir guruh shaxslar metropoliten tarkiblaridan birini vaqtincha nazorat ostiga olgan.
Yuqorida qayd etilgan barcha holatlarda qonunbuzarlarning maqsadlari o‘xshash bo‘lgan: harakatlar faqat ko‘ngilxushlik uchun, potensial xavflarni hisobga olmasdan amalga oshirilgan.
Izoh (0)