Yaman husiylari Qizil dengizda Isroilga aloqador kemalarga hujum qilishi tufayli 2024-yilda jahon iqtisodiyoti 200 milliard dollar zarar ko‘rdi. Dengiz orqali yuk tashish narxi besh baravar oshdi. Bu haqda The Economist xabar berdi.
Misr eng katta va to‘g‘ridan to‘g‘ri zarar ko‘rgan, u Suvaysh kanalidan 7 milliard dollar daromadni, ya’ni odatdagi daromadning taxminan uchdan bir qismini yo‘qotgan. AQSH o‘z kemalarini himoya qilish uchun 5 milliard dollar sarflagan.
Husiylar 2024-yil davomida kemalarni Afrikani aylanib o‘tishga majbur qildi. Osiyodan keladigan yo‘nalishlar taxminan olti ming kilometrga cho‘zildi, yo‘l vaqti 10-14 kunga uzaydi.
Amerika razvedkasiga ko‘ra, yuqori tezlikda uzoqroq suzish yonilg‘i sarfini oshirib, har bir reys narxiga, taxminan, bir million dollar qo‘shdi. Qizil dengizda yuk tashish uchun sug‘urta tariflari 20 baravar oshdi.
Xitoy va Rossiya, aksincha, g‘olib chiqdi, chunki husiylar bu mamlakatlarning kemalariga hujum qilmasliklarini bildirdi. Hozirda Suvaysh kanali orqali olib o‘tilayotgan neftning katta qismi Rossiyaga tegishli. Kemachilik kompaniyalarining foydasi ham oshdi.
Umuman olganda, ta’minot zanjirlari Qizil dengizning kutilmaganda amalda blokadasi sharoitida barqarorlikni ko‘rsatdi, deyiladi xabarda.
AQSH va Isroil harbiylari kemalari nishonga olinishiga javoban husiylarning harbiy obyektlari va tizimlariga zarbalar bermoqda. Amerika Qo‘shma Shtatlari va Isroildan tashqari, dengiz kemachiligining xavfsizligini ta’minlash maqsadida operatsiyalarda G‘arbning boshqa mamlakatlari, shu jumladan, Buyuk Britaniya ham ishtirok etdi.
Yaman husiylari Isroil hududini va unga aloqador kemalarni o‘qqa tutishni to‘xtatdi. Ular Isroil va HAMAS o‘rtasida tuzilgan o‘t ochishni to‘xtatish to‘g‘risidagi bitimga rioya qilishini ta’kidladi. Husiylar Isroilning “mintaqadagi barqarorlik va xavfsizlikka tahdid bo‘lib qolayotgani”ni aytgan.
Izoh (0)