Xitoyda chivin orqali yuqadigan chikungunya virusi bilan kasallanganlar soni 7 mingdan oshdi. Hukumat hasharotlarga qarshi kurashish uchun dorilar sepmoqda va dronlarni ishga solmoqda. Bu haqda CNN xabar berdi.
Eng ko‘p kasallanish holatlari Foshan shahrida qayd etilgan. Bu Xitoy tarixidagi eng keng ko‘lamli chikungunya tarqalishi sifatida baholanmoqda. Kasallik isitma va bo‘g‘imlardagi og‘riq bilan birga namoyon bo‘ladi.
E’tiborli jihati shundaki, chikunguniya Xitoyning materik qismida ilgari hech qachon qayd etilmagan edi. Bu aholining aksariyatida oldindan immunitet yo‘qligini ko‘rsatadi, bu esa virusning tez tarqalishiga imkon beradi, deydi Oksford universiteti olimi Sezar Lopes-Kamacho.
Kuchli yog‘ingarchilik va yuqori harorat Xitoydagi vaziyatni yanada murakkablashtirdi. Rasmiylar dronlardan foydalanib, chivinlar tuxum qo‘yadigan turg‘un suvlarni aniqlashga harakat qilmoqda. Rasmiylar tashqaridagi suv idishlarini bo‘shatmagan odamlarni jarimaga tortish bilan ogohlantirgan. Aholi 10 ming yuan (1,4 ming dollar) gacha jarimaga tortilishi va elektr ta’minotidan uzilishi mumkin.
Aholi chivinlardan himoyalanish uchun to‘r va boshqa vositalardan foydalanmoqda. Virusga chalingan bemorlar kamida bir hafta shifoxonada qolmoqda. AQSH hukumati fuqarolariga Foshan shahridagi Guandun provinsiyasi, Boliviya va Hind okeanidagi ayrim orol davlatlariga safar qilishda ehtiyot bo‘lishni tavsiya qilgan.
Avvaliga virus sababli ikki haftalik uy karantini joriy etilgan edi, biroq keyinchalik u kasallik odamdan odamga yuqmasligi sabab bekor qilingan.
Izoh (0)