Isroil HAMASni o‘t ochishni to‘xtatish to‘g‘risidagi bitim shartlarini buzganlikda aybladi. Bu haqda Deutsche Welle xabar berdi.
Ayblovga ko‘ra, HAMAS garovga olinganlarni ozod qilishning birinchi bosqichi doirasida isroillik Arbel Yahudni qo‘yib yubormagan. Tirik va halok bo‘lgan asirlar ro‘yxatini ham taqdim etmagan. Isroilning o‘g‘irlanganlar va bedarak yo‘qolganlarning oilalari bilan ishlash boshqarmasi bu haqda ma‘lum qildi.
“Kechagi bosqichni amalga oshirish davomida HAMAS kelishuvlarni ikki marta buzdi: Arbel Yahud hali ham ozod qilinmagan, birinchi bosqich uchun garovga olinganlarning joriy maqomi ro‘yxati hali ham taqdim etilmagan. Shu munosabat bilan G‘azo aholisining sektor shimoliga ko‘chishiga ruxsat bermaslik to‘g‘risida qaror qabul qilindi”, dedi Isroil bosh vaziri devonxonasi maslahatchisi Dmitriy Gendelman.
Ta‘kidlanishicha, hozirda Isroil tomoni AQSH va boshqa davlatlar vositachiligida Arbel Yahudni ozod qilish masalasini hal qilish uchun “ahamiyatli sa’y-harakatlarni” amalga oshirmoqda.
“Biz barcha garovga olinganlarni — tiriklarni ham, halok bo‘lganlarni ham qaytarishga erishishga qat’iy qaror qildik”, deyiladi xabarda.
HAMAS 200 nafar falastinlik mahbus evaziga 4 nafar isroillik garovga olingan ayolni ozod qildi
Bir hafta oldin HAMAS Isroil bilan kelishuvni amalga oshirish doirasida garovga olinganlarning ikkinchi guruhini ozod qildi. To‘rt nafar isroillik harbiy qiz evaziga 200 nafar falastinlik mahbuslar, jumladan, terrorizmda ayblanib, umrbod qamoq jazosiga hukm qilinganlar ozod etildi.
Isroil armiyasi matbuot xizmati rahbari Daniel Xagari HAMAS fuqarolarni garovga olish shartiga rioya qilmaganini aytdi.
”Biz Arbel Yahudni, shuningdek, Shiri Bibas va uning ikki yosh farzandini uyga qaytarish niyatidamiz”, dedi u.
Shu bilan birga, Arbel Yahudni ozod qilish masalasi hal qilinmaguncha, Isroil tinch aholiga G‘azo sektorining shimoliga qaytishga ruxsat bermaydi, dedi Netanyaxuning idorasi.
Al Jazeera telekanaliga ko‘ra, HAMAS vositachilarga Arbel Yahud tirik ekani va 1-fevral kuni Isroilga topshirilishi haqida xabar bergan. Yahud harbiy xizmatchi bo‘lib, Isroil armiyasida tayyorgarlikdan o‘tgan.
Izoh (0)