Toshkent metropolitenida 2024-yilning yanvar—dekabr oylarida jami 270,3 mln nafar yo‘lovchi tashilgan. Bu haqda Statistika agentligi xabar berdi.
Maʼlum qilinishicha, ushbu ko‘rsatkich 2023-yilga nisbatan 98,3 mln nafar yo‘lovchiga yoki 57,2 foizga o‘sgan.
Ushbu ko‘rsatkich yillar kesimida quyidagicha:
- 2020-yil — 38,8 mln nafar;
- 2021-yil — 101,8 mln nafar;
- 2022-yil — 136,7 mln nafar;
- 2023-yil — 172 mln nafar;
- 2024-yil — 270,3 mln nafar.
Toshkent metrosidagi o‘zgarishlar
Avvalroq 11-yanvar kuni Toshkent metropoliteniga yana yangi to‘rt vagonli 3 ta zamonaviy metro poyezdlari olib kelingandi.
2024-yil 31-dekabr kuni Toshkent metrosi uchun 3 ta yangi harakat tarkibi — 12 ta metro vagoni olib kelingani xabar qilingandi.
Transport vazirligi bergan ma’lumotga ko‘ra, 2017-yildan 2019-yilgacha 36 ta poyezd ekspluatatsiya qilingan. 2024-yilga kelib ularning soni 65 taga yetkazildi. 2025-yil yakuniga qadar yana 26 ta zamonaviy tarkib xarid qilinishi rejalashtirilgan.
So‘nggi vaqtlarda metro xizmatiga bo‘lgan talab kun sayin ortib bormoqda. Toshkent metropoliteni 16-dekabr kuni birinchi marta bir kunda 1 million yo‘lovchiga xizmat ko‘rsatdi.
Millioninchi yo‘lovchiga jamoat transportidan bir yil davomida bepul foydalanish imkonini beruvchi transport kartasi sovg‘a qilindi.
Izoh (0)