22-dekabr kuni Nyu York metrosida uxlab yotgan yo‘lovchini o‘ldirish va yoqib yuborishda ayblanayotgan 33 yoshli Sebastyan Sapeta sudda o‘zini aybdor emasligini aytdi.
Associated Press nashrining aniqlik kiritishicha, sud majlisi 5 daqiqadan kamroq davom etgan.
Tergov ma’lumotlariga ko‘ra, gvatemalalik fuqaro 23-dekabr kuni Bruklindagi Koni Aylend Stiluell avenyu metro bekatida vagonda 57 yoshli Debrina Kavamni o‘t oldirgich yordamida yoqib yuborgan. Ayolning kiyimi yonib ketgach, u o‘z ko‘ylagi bilan olovni yanada kuchaytirgan. Shundan so‘ng erkak metro vagonidan chiqib, platformadagi o‘rindiqqa o‘tirgan va yonayotgan ayolni kuzatib turgan. Bu holat voqea joyiga yetib kelgan politsiyachining tana kamerasi tomonidan qayd etilgan.
Erkakni qo‘lga olishda politsiyaga qo‘ng‘iroq qilib, uni poyezdlarning birida ko‘rganlarini aytgan maktab o‘quvchilari yordam berdi.
Shundan so‘ng politsiya xodimlari gumonlanuvchini poyezdlarda qidira boshladi va uni Manxettendagi mashhur Empayar Steyt Bilding osmono‘par binosi yaqinida joylashgan “Gerold skver” bekatida topishdi. CBS News xabariga ko‘ra, gumonlanuvchi 2018-yilda Gvatemaladan AQSHga kelgan.
Hujumchi va jabrlanuvchi tanish bo‘lmagan. Voqea sodir bo‘lishidan oldin ular bir-birlari bilan suhbatlashmagan.
Ayblovga ko‘ra, Sapeta videoda haqiqatan ham o‘zi ekanligini tan olgan. Biroq, gumonlanuvchining aytishicha, u ko‘p ichadi va nima bo‘lganini eslay olmaydi.
Ish bo‘yicha navbatdagi sud majlisi 12-martga belgilangan. Ayblanuvchi muddatidan oldin ozod qilinish huquqisiz umrbod qamoq jazosiga tortilishi mumkin.
Izoh (0)