Gonkongda Zaha Hadid Architects byurosi tomonidan loyihalashtirilgan dunyodagi eng qimmatbaho osmono‘par bino — The Henderson minorasi qurilishi yakuniga yetmoqda. Biznes markazlar, turli ofislar hamda ko‘ngilochar maskanlardan iborat mazkur bino joylashgan hudud 2017-yilda xarid qilingan va har bir kvadrat metri 950 ming dollarga baholangan. Shu tariqa The Henderson binosi dunyodagi eng qimmat binoga aylangan.
36 qavatli bino Gonkongning biznes shaharchasida joylashgan bo‘lib, qurilish ishlari hali ham davom etayotgan bo‘lsa-da, allaqachon megapolisning eng zamonaviy me’moriy yodgorligiga aylangan. U dunyoga mashhur boshqa binolar — Xitoy Bankining osmono‘par binosi va HSBC binosi oldida qurilmoqda.
“Biz ushbu loyihaga qo‘l urar ekanmiz, XXI asrga xos noyob va boshqa arxitektura namunalariga o‘xshamaydigan zamonaviy bino barpo etish kerakligini bilar edik va mazkur loyiha butun dunyo bo‘ylab shov-shuvga sabab bo‘lishini istar edik”, dedi Zaha Hadid Architects rahbari Patrik Shumaxer.
Loyiha 2023-yilda yakunlanishi kerak edi, ammo qurilish va dizayn ishlari muddati uzaytirildi. Yaqin kunlarda olingan fotosuratlardan ko‘rish mumkinki, bino allaqachon yakunlanish arafasida. Uning aksariyat shisha panellari to‘liq o‘rnatilgan. Bunday panellar jami 4 mingga yaqin bo‘ladi.
Minora korpusi Gonkongning ikkita metro bekatiga va Chater Garden bog‘iga olib boradigan piyodalar yo‘liga ulanadi, ularning yaqin joylashuvi binoning tashqi ko‘rinishida aks etgan: The Henderson minorasi yonidagi osmono‘par binolardan o‘zining geometrik figurasi bilan farq qiladi. Binoning ilk qavatlari orxideya gullarini yodga soluvchi o‘ziga xos shaklga ega.
Izoh (0)