Toshkent metropoliteni 16-dekabr kuni birinchi marta bir kunda 1 million yo‘lovchiga xizmat ko‘rsatdi.
Metropoliten mas’ul xodimlari ishtirokida “Metrodan foydalangan millioninchi yo‘lovchi”ni aniqlash tadbiri o‘tkazildi va unda omadli yo‘lovchi aniqlandi. U poytaxtda yashovchi Kozim Sohibov bo‘ldi. Unga “Chinor” bekati boshlig‘i Abdurahmon Abdug‘afforov esdalik sovg‘asi va bir yil davomida Toshkent jamoat transportidan (metro va avtobus) bepul foydalanish imkonini beruvchi transport kartasini topshirdi.
Metropoliten matbuot xizmatining ma’lum qilishicha, so‘nggi vaqtlarda metro xizmatiga bo‘lgan talab kun sayin ortib bormoqda. O‘tgan haftaning seshanba-juma kunlarida o‘rtacha kunlik yo‘lovchi oqimi 985-995 mingni tashkil etgan.
Bugungi kunda metropoliten liniyalarining umumiy uzunligi 71 kilometrga, bekatlar soni esa 50 taga yetkazildi.
Izoh (0)